मुंबई, ता. ४ : मालमत्तेच्या लोभापोटी मायलेकाचे अपहरण करून त्यातील मुलाची हत्या करणाऱ्या पाच आरोपींना चेंबूर पोलिसांनी अटक केली. मुनीर पठाण, रोहित अदमाने, राजू दरवेश, ज्योती वाघमारे आणि प्रणव रामटेके अशी त्यांची नावे आहेत. ५ एप्रिलपासून हे मायलेक बेपत्ता होते. महिलेची सुटका करण्यात पोलिसांना यश आले आहे. तसेच मुलाची हत्या केल्याची कबुली आरोपींनी पोलिसांना दिली आहे.
रोहिणी कांबळे आणि विशाल कांबळे या मायलेकांचे ५ एप्रिलला चेंबूरमधील हॉटेलमधून अपहरण करण्यात आले होते. कोल्हापुरातील मालमत्तेवरून कोर्टकचेरी सुरू असल्याने दोघे मुंबईत आले होते. रोहिणी यांच्या बहिणीने दोघे बेपत्ता झाल्याची तक्रार २१ एप्रिलला पोलिसांत नोंदवली. त्यानंतर पोलिसांनी तपास सुरू केला. गोरेगावातील रॉयल पाम ब्लॉक सेक्टरमध्ये त्यांना ठेवले होते. रोहिणी यांनी आवाज करू नये, यासाठी त्यांना सतत गुंगीचे औषध दिले जात होते. त्यांना पोलिसांनी तत्काळ रुग्णालयात दाखल केल्याने त्यांचा जीव वाचला. मुलगा विशाल याला मालमत्ता खरेदी-विक्रीच्या बैठकीसाठी पनवेलला नेऊन एका व्हिलामध्ये हत्या करून त्याचा मृतदेह बडोदा-अहमदाबाद महामार्गाच्या कडेला फेकून देण्यात आला असल्याची माहिती पोलिसांना आरोपींनी दिली. कांबळे माय-लेकाची मालमत्ता मिळविण्यासाठी हा कट रचण्यात आल्याची कबुली पाचही जणांनी दिली आहे.