पेण, ता. ४ (वार्ताहर) : कोकणातील मध्यवर्ती ठिकाण तसेच मुंबई-गोवा महामार्गालगत असणारे पेण उपजिल्हा रुग्णालय वैद्यकीय सुविधांच्या दृष्टीने महत्त्वाचे आहे. अशातच गेल्या तीनचार महिन्यांपासून रुग्णालयातील सोनोग्राफी मशीन बंद असल्यामुळे तालुक्यातील डोंगराळ भागातील शेतकरी, आदिवासी, कष्टकरी, मोलमजुरी करणाऱ्यांची गैरसोय होत आहे.
पेण तालुक्याची वाढती लोकसंख्या पाहता येथील वैद्यकीय सुविधा तोकडी पडू लागली आहे. अशातच अलिबाग येथील जिल्हा रुग्णालयात जाण्यासाठी येणारा खर्च सर्वसामान्य रुग्णांसह नागरिकांना परवडणारा नाही. अशातच सध्या पावसाचे दिवस असल्याने आरोग्याचे विविध प्रश्न उद्भवणाऱ्या गर्भवती महिला, ज्येष्ठ नागरिक इतरही आजारपण असलेले रुग्णांची संख्या वाढत आहे; मात्र गेल्या तीनचार महिन्यांपासून पेण उपजिल्हा रुग्णालयातील सोनोग्राफी मशीन बंद असल्याने रुग्णांना खासगी रुग्णालयात जावे लागत आहे. त्यामुळे हे मशीन तात्काळ सुरू करावे, अशी मागणी सामाजिक कार्यकर्ते हरीष बेकावडे यांनी केली आहे.
-------------------------------------------------
पेण उपजिल्हा रुग्णालयात शासनाच्या माध्यमातून जिल्हा रुग्णालयाच्या वतीने दोनतीन महिन्यांपूर्वी आलेले सोनोग्राफी मशीन चालवण्यासाठी तज्ज्ञ डॉक्टर नसल्याने हे मशीन बंद आहे. याबाबत वरिष्ठांकडे पत्रव्यवहार केला आहे.
- पांडुरंग गाडे, सहायक अधीक्षक, उपजिल्हा रुग्णालय, पेण