नेरूळ, ता. १८ (बातमीदार) : नवी मुंबई महापालिकेची लवकरच महिलांसाठी पहिली व्यायामशाळा सुरू होणार आहे. बेलापूर सेक्टर २० मध्ये असलेल्या कम्युनिटी सेंटरच्या तिसऱ्या मजल्यावर ही व्यायामशाळा असून यासाठी पालिकेकडून सर्व आवश्यक पायाभूत सुविधा आणि उपकरणे उभारण्यात येत आहेत.
प्रशासनाने ९४ लाख किमतीची उपकरणे खरेदी करण्यासाठी निविदा मागवली आहे. माजी नगरसेविका व नवी मुंबई काँग्रेसच्या महिला जिल्हाध्यक्ष पूनम पाटील यांनी ही संकल्पना महिलांना डोळ्यासमोर ठेवून मांडली होती. यासाठी कायम पाठपुरावाही केला होता. अखेर त्याला यश आले आहे. कम्युनिटी सेंटरचा तिसरा मजला पूर्वी एका खासगी जिमला भाड्याने दिला होता. आता बऱ्याच काळापासून तो रिक्त आहे. तेच ठिकाण महिलांसाठी आरोग्य केंद्र म्हणून पालिकेद्वारे विकसित केले जाणार आहे. व्यायामशाळेची संकल्पना प्रभाग क्रमांक १०६ च्या माजी नगरसेविका पूनम पाटील यांनी मांडली होती. त्या म्हणाल्या, स्त्रिया आपल्या कुटुंबाच्या गरजा जपताना आरोग्याकडे दुर्लक्ष करतात. त्यांच्यासाठी फार कमी व्यायामशाळा आहेत. खर्च अधिक असल्याने त्या व्यायामशाळा वापरण्यास नाकारतात. याबाबत महिलांशी बोलताना अनेक बाबी समोर आल्या.