मुलुंडमध्ये रानभाजी महोत्सव
मुलुंड, ता. २६ (बातमीदार) ः रानभाज्यांमध्ये अनेक प्रकारची खनिजे आणि शरीरासाठी उपयुक्त अशी जीवनसत्त्वे आणि प्रथिने मुबलक प्रमाणात असतात. पावसाळ्यात पिकवल्या जाणाऱ्या या विविध प्रकारच्या भाज्या सर्वसामान्यांपर्यंत पोहोचवण्यात आदिवासी समाजाचा मोठा वाटा आहे आणि रानभाज्या विकून ते आपला उदरनिर्वाह करतात, किंबहुना हीच त्यांची उपजीविका असते. अशा आदिवासींना प्रोत्साहन देण्याच्या उद्देशाने महाराष्ट्र शासनाच्या कृषी विभागामार्फत राज्यातील विविध शहरांमध्ये भाजीपाला लागवड करण्यासाठी प्रोत्साहन दिले जात आहे.
मुलुंडमध्ये महोत्सवाच्या आयोजनासाठी राज्य सरकारने पुढाकार घेतला आहे. या उपक्रमांतर्गत मुंबईतील मुलुंडमध्ये प्रथमच या महोत्सवाचे आयोजन करण्यात आले आहे. या मंदीच्या काळात मुलुंडच्या जनतेने या उत्सवात उत्साहाने सहभागी होऊन आदिवासींना आर्थिक मदत करावी, असे आवाहन महाराष्ट्र सरकार आणि मराठमोळी मुलुंड संस्थेने केले आहे. या महोत्सवाचे आयोजन मुलुंड पूर्वेतील मुलुंड हायस्कूल हॉल, आंध्र बँकेजवळ, चंदनबाग रोड, पाच रास्ता, मुलुंड पश्चिम येथे शनिवारी (ता. २९) सकाळी दहा ते सायंकाळी पाच यादरम्यान करण्यात आले आहे.