वाशी, ता. २९ (बातमीदार) : ठाणे-बेलापूर मार्ग आणि कोपरखैरणे येथील अंतर्गत रस्त्याला जोडणाऱ्या भुयारी मार्गामधील गटारावरील लोखंडी जाळ्या चोरीला गेल्या आहेत. मुसळधार पावसात तर पाणी साचल्यानंतर वाहनचालकांना गटाराचा अंदाज येत नसल्याने अपघात होत आहे. पादचाऱ्यांनाही तेथून चालणे जिकिरीचे होत आहे.
कोपरखैरणे येथील भुयारी मार्गात पावसाळ्यामध्ये पाणी साचू नये. यासाठी भुयारी मार्गात गटार बांधण्यात आले. त्यावर पालिकेकडून जाळी बसवण्यात आल्या आहे; मात्र काही समाजकंटकांनी त्या चोरून नेल्या आहेत. गटारावर जाळी नसल्यामुळे अपघातही घडत आहेत. त्यामुळे या गटारावर लोखंडी जाळी बसवण्यात याव्यात, अशी मागणी वाहनचालकांकडून करण्यात येत आहे.

भुयारी मार्गातील गटारावर जाळ्या बसवल्या होत्या. काही समाजकंटकांकडून त्या चोरण्याचा प्रकार घडत आहे. भुयारी मार्गाची पाहणी करून जाळ्या बसवण्यात येतील.
- सुनील मोरे, विभाग अधिकारी, कोपरखैरणे

कोपरखैरणेवरून ठाणे-बेलापूर मार्गावर जाण्यासाठी भुयारी मार्ग आहे. या भुयारी मार्गातून दोनच चारचाकी एका वेळी जाऊ शकतात. त्या बाजूने दुचाकीला जायचे असले तरी गटारावर जाळी नसल्यामुळे जाता येत नाही. पावसाळ्यामध्ये तर या ठिकाणी अपघाताचे प्रकारही घडत आहे.
- अंकुश नाईक, वाहनचालक