विरार, ता. ६ (बातमीदार) : म्हातारपणात येणारे नैराश्य, वेगवेगळ्या आजरांमुळे चिडचिड होते. यावर मात करायची असेल तर नेहमी हसतखेळत राहायला हवे. हास्य मनाच्या व्याधीवरील सगळ्यात चांगला उपचार असल्याचे प्रतिपादन मानसोपचारतज्ज्ञ डॉ. सुरेश पाटील यांनी वसई येथे ज्येष्ठ नागरिकांच्या कार्यक्रमात केले.

ज्येष्ठ नागरिक समाजकल्याण संस्था पापडी वसई व वसई तालुका पत्रकार संघ यांच्या संयुक्त विद्यमाने नुकतेच हुतात्मा बाळा सावंत स्मारक पापडी येथे ज्येष्ठांसाठी मनोविकाराबाबत मार्गदर्शन कार्यक्रम आयोजित केला होता. या कार्यक्रमात मानसोपचारतज्ज्ञ डॉ. सुरेश पाटील यांनी मार्गदर्शन केले.

डॉ. सुरेश पाटील यांनी खेळीमेळीच्या वातावरणात ज्येष्ठ नागरिकांशी संवाद साधताना त्यांच्या मनातील अनेक प्रश्नांना उत्तरे दिली. आपले वय होत असतानाही मनाने तरुण राहण्याचा प्रयत्न करायला हवा. रोज चालणे, संतुलित आहार घेणे अशा गोष्टींकडे लक्ष द्यायला हवे. उतारवयात डायबेटीस आणि ब्लड प्रेशर हे राहू-केतूप्रमाणे जीवनात आलेले असतात. त्यांना दूर ठेवण्यासाठी तणावमुक्त राहा, असा सल्ला त्यांनी या वेळी ज्येष्ठ नागरिकांना दिला. कार्यक्रमाला ज्येष्ठ नागरिक संघाच्या अध्यक्षा हेमलता हटकर, विंदाली प्रभुदेसाई, भरत म्हात्रे, अरुणसिंग, शिवकुमार शुक्ला आणि आनंद गदगी उपस्थित होते.