टिटवाळा, ता. ९ (बातमीदार) : विद्यार्थ्यांनी यशस्वी होण्यासाठी त्यांचे ध्येय निश्चित करायला हवे. यशस्वी होण्यासाठी विद्यार्थ्यांनी नवतंत्र युगासोबत राहून विवेकाची कास धरावी, असे आवाहन विश्वनाथ वारिंगे यांनी जीवनदीप कला, वाणिज्य व विज्ञान महाविद्यालयात केले. गोवेलीत ‘राष्ट्र उभारणीत युवकांचे योगदान’ या विषयावर विद्यार्थ्यांना मार्गदर्शन केले.

स्वामी विवेकानंद यांची राष्ट्रउभारणीतील विचारधारा स्पष्ट करताना त्यांनी शिव खेरा यांच्या ‘यश आपल्या हातात’ या पुस्तकातील उदाहरणे व दाखले दिले. युवक सामाजिक परिवर्तनाचा मोठा स्रोत आहेत. फक्त योग्य ध्येयनिश्चिती कृतीत आणण्यासाठी खडतर परिश्रम यांची सांगड जीवनात आवश्यक आहे. असे सांगत विश्वनाथ महाराजांनी तरुणांना त्यांच्या प्रथम कर्तव्याची जाणीव करून दिली. यशाने हुरळून जाऊ नका आणि अपयशाने खचू नका, असा सल्ला त्यांनी दिला.

संस्थेचे अध्यक्ष रवींद्र घोडविंदे यांनी व्याख्यानमालेचे महत्त्व सांगत राष्ट्रीय कीर्तनकार विश्वनाथ वारिंगे यांच्या सामाजिक, धार्मिक, भक्ती मार्गातील सेवा कार्याची माहिती दिली; तर प्रा. नरेंश टेभे यांनी सूत्रसंचालन केले. या वेळी प्राध्यापक तसेच विद्यार्थी मोठ्या संख्येने उपस्थित होते.