ठाण्यात पुन्हा सिलिंडरची गॅसगळती होऊन आग
- दोघे जखमी
सकाळ वृत्तसेवा
ठाणे, ता. १४ : दिव्यात गॅस सिलिंडरची गळती होऊन लागलेल्या आगीत दोन जण जखमी झाल्याची घटना ताजी असताना, वागळे इस्टेट, किसननगर येथे गॅस सिलिंडरमधून गळती होऊन आग लागली आहे. त्या आगीत विवेक गुप्ता (वय २५) आणि सुनीता गुप्ता (वय ४५) ते दोघेही १० टक्के भाजले असून त्यांच्यावर खासगी रुग्णालयात उपचार सुरू आहेत. ही घटना शनिवारी सायंकाळी पावणेसहा ते सहा वाजण्याच्या सुमारास घडली.
वागळे इस्टेट, किसननगर क्रमांक- ३, ओम शांती अपार्टमेंट या तळ अधिक ३ मजली पहिल्या मजल्यावरील रूम क्रमांक १०४ हे ओमप्रकाश गुप्ता यांच्या मालकीचे आहे. शनिवारी सायंकाळी या घरात गॅस सिलिंडर गळती झाली. यामध्ये दोघे जण जखमी झाल्याची माहिती मिळताच घटनास्थळी महावितरण कर्मचारी, आपत्ती व्यवस्थापन कक्षाचे कर्मचारी व अग्निशमन दलाचे जवान यांनी धाव घेतली. ही आग काही मिनिटात नियंत्रणात आणण्यात अग्निशमन दलाच्या जवानांना यश आले. यामध्ये विवेक याच्या दोन्ही पायाला आणि हाताला व पाठीला भाजल्यामुळे दुखापत झाली आहे; तर सुनीता यांच्या दोन्ही हाताला, पायाला, चेहऱ्यावरती व छातीवरती भाजल्यामुळे दुखापत झाली आहे.