अंधेरी, ता. २४ (बातमीदार) ः खुनाच्या गुन्ह्यातील आरोपीच्‍या पत्‍नीला वकिलाने ९० हजार रुपये घेऊन जामिनाची बनावट आदेश पत्र आणि बनावट रक्कम भरलेली पावती देऊन फसवणूक केल्‍याची घटना समोर आली आहे. या प्रकरणी हिरल जाधव याच्याविरोधात दहिसर पोलिसांनी फसवणुकीचा आणि बनावट दस्तावेज बनविण्याचा गुन्हा दाखल केला आहे.

फिर्यादी ईश्वरी नायडू (२६) या तक्रारदाराचे पती खुनाच्या गुन्ह्यात कारागृहात बंदिस्त आहेत. त्यांना जामिनावर बाहेर काढण्यासाठी ईश्वरी नायडू प्रयत्न करीत होत्‍या. त्‍या चांगल्या वकिलाच्या शोधात असताना २०२२ मध्ये हिरल जाधव या वकिलाला भेटल्‍या. त्याने ईश्‍वरी यांच्‍याकडे पतीला जामिनावर बाहेर काढण्यासाठी ६० हजार रुपये लागतील, असे सांगितले. त्‍यामुळे ईश्‍वरी नायडू यांनी ही रक्कम दिली.

त्‍यानंतर हिरल जाधव यांनी त्‍यांना जामिनाची संबंधित कागदपत्रे दिली. तक्रारदार कारागृहात गेल्यानंतर संबंधित जामिनावरील सुटकेचे आदेश आणि रकमेची पावती बनावट असल्याचे समोर आले. त्‍यामुळे ईश्‍वरी नायडू यांनी पोलिसांकडे धाव घेतली. चौकशीनंतर वकील हिरल जाधव याच्यावर दहिसर पोलिस ठाण्यात फसवणूक आणि बनावट दस्तावेज बनविल्याप्रकरणी गुन्हा दाखल करण्यात आला.