वांद्रे-वरळी सी-लिंकवरून
उडी घेत तरुणाची आत्महत्या
मुंबई, ता. १२ : मुंबईतील वांद्रे-वरळी सी-लिंकवरून उडी मारून एका २८ वर्षीय तरुणाने आत्महत्या केल्याची धक्कादायक घटना समोर आली आहे. आकाश सिंग असे आत्महत्या केलेल्या तरुणाचे नाव आहे.
आकाश मुंबईच्या परळ परिसरातील रहिवासी असून एका खासगी बँकेत नोकरीला होता. शुक्रवारी (ता. १०) तो टॅक्सीने कार्यालयातून घरी जात होता. सी-लिंकवरून जात असताना त्याने टॅक्सी थांबवली आणि पुलावरून थेट समुद्रात उडी घेतली. या प्रकरणी पोलिसांनी आकस्मिक मृत्यूची नोंद केली आहे.
वरळी पोलिसांनी दिलेल्या माहितीनुसार, आकाशने वांद्रे-कुर्ला कॉम्प्लेक्सहून परळला जाण्यासाठी टॅक्सी बुक केली. त्यानंतर त्याने चालकाला टॅक्सी वांद्रे-वरळी सी लिंकवर नेण्यास सांगितली. पुलावरून जात असताना आकाश मोबाईलवर बोलत होता. त्याने अचानक चालकाला टॅक्सीमधून मोबाईल बाहेर पडला असल्याचे सांगितले. त्यामुळे चालकाने सी-लिंकवर टॅक्सी थांबवली. त्यानंतर आकाशने टॅक्सीमधून खाली उतरत थेट समुद्रात उडी घेतली. या प्रकरणी पोलिस अधिक तपास करत आहेत.