कल्याण, ता. २७ (वार्ताहर) : संविधान दिन आणि २६/११ च्या दहशतवादी हल्ल्यात शहीद झालेल्या जवानांच्या स्मरणार्थ कल्याणमध्ये मॅरेथॉन रॅली काढण्यात आली होती. कल्याणच्या शिवाजी चौकात एटीएसचे माजी पोलिस महासंचालक के. पी. रघुवंशी, इंटकचे प्रदेशाध्यक्ष प्रकाश मुथा, कमलादेवी शैक्षणिक संस्थेचे अध्यक्ष सदानंद तिवारी, कल्याण जिल्हा बार असोसिएशनचे अध्यक्ष प्रकाश जगताप, उद्योजक मनीष मुथा, डॉ. दौलतसिंग पालीवाल, सीए अन्वेषा मुथा यांच्या प्रमुख उपस्थितीत मशाल प्रज्वलित करून मॅरेथॉनला हिरवा झेंडा दाखवण्यात आला.

सर्वप्रथम शिवाजी महाराज व बाबासाहेब आंबेडकर यांच्या प्रतिमेला पुष्पहार अर्पण करण्यात आला. त्यानंतर २६/११ च्या दहशतवादी हल्ल्यात शहीद झालेल्या जवानांना पुष्पहार अर्पण करून आदरांजली वाहण्यात आली. या वेळी पालीवाल यांच्या हस्ते शहीद आणि देशाचा अभिमान अशा संदेशांनी भरलेले फुगे सोडण्यात आले. शहाड येथील साई निर्वाण संकुल येथे मॅरेथॉनचा ​​समारोप झाला. या वेळी महाविद्यालयाच्या प्राचार्या सपना गादिया, लेफ्टनंट विनीता हुबळीकर, सुमित पालीवाल, जयदीप सानप, बाला बर्वे, मंगलसिंग चौहान, संजय सविंदर आणि डीबीएस शाळेचे संचालक मनोज सिंग आदी उपस्थित होते.