सकाळ वृत्तसेवा
मुंबई, ता. १ : उपनगरी रेल्वे मार्गावरील रुळांची दुरुस्ती आणि सिग्नल यंत्रणेची काही तांत्रिक कामे करण्यासाठी रविवारी (ता. ३) मध्य रेल्वे मार्गावर मेगाब्लॉक घेण्यात येणार आहे. मध्य रेल्वेच्या माटुंगा-मुलुंडदरम्यान अप आणि डाऊन जलद मार्गावर, तर हार्बर मार्गावरील सीएसएमटी-चुनाभट्टी/वांद्रे अप आणि डाऊन मार्गावर मेगाब्लॉक घेण्यात येणार आहे. पश्चिम रेल्वेवर दिवसा कोणताही मेगाब्लॉक नाही.

मध्य रेल्व
कुठे - माटुंगा ते मुलुंड
कधी - सकाळी ११.०५ ते दुपारी ३.५५ पर्यंत

परिणाम
सीएसएमटी येथून सुटणाऱ्या जलद मार्गावरील सेवा माटुंगा आणि मुलुंड स्थानकांदरम्यान डाऊन धीम्या मार्गावर वळवण्यात येतील. ठाण्याच्या पुढे या गाड्या डाऊन जलद मार्गावर वळवण्यात येतील. ठाणे येथून सुटणाऱ्या अप जलद मार्गावरील सेवा मुलुंड आणि माटुंगादरम्यान अप धीम्या मार्गावर वळवण्यात येणार आहेत. त्यानंतर पुन्हा अप जलद मार्गावर चालवण्यात येतील. या सेवा गंतव्यस्थानी नियोजित वेळेच्या १० ते १५ मिनिटे उशिराने पोहोचेल.

हार्बर रेल्वे
कुठे - सीएसएमटी ते चुनाभट्टी/वांद्रे
कधी - ११. १० ते ४.४० वाजेपर्यंत

परिणाम
सीएसएमटी/वडाळा येथून वाशी/बेलापूर/पनवेलसाठी सुटणारी डाऊन हार्बर मार्गावरील सेवा आणि वांद्रे/गोरेगाव येथून सीएसएमटीसाठी डाऊन हार्बर मार्गावरील सेवा रद्द राहणार आहे. पनवेल/बेलापूर/वाशी येथून सीएसएमटीसाठी सुटणारी अप हार्बर मार्गावरील सेवा आणि गोरेगाव/वांद्रे येथून सीएसएमटी सुटणारी अप हार्बर मार्गावरील सेवा बंद राहणार आहे. तथापि, ब्लॉकच्या कालावधीत पनवेल आणि कुर्ला (प्लॅटफॉर्म क्र. ८) दरम्यान विशेष सेवा २० मिनिटांच्या वारंवारतेने चालवल्या जाणार आहेत.