बोरिवली दहिसरमध्ये उद्यानांचा विकास

सकाळ वृत्तसेवा
मुंबई, ता. ४ : बोरिवली आणि दहिसरमध्ये उद्यानांचा विकास करण्यात येणार आहे. जॉगिंग ट्रॅक, रंगरंगोटी, आकर्षक विद्युत रोषणाईसह विविध सोयी-सुविधांसह उद्याने सुसज्ज करण्यात येणार आहेत. यासाठी मुंबई महापालिका तब्बल ७ कोटी २० लाख रुपये खर्च करणार आहेत.
योगीनगर आणि एक्सर रोड जंक्शन रिकामे भूखंड असून या जागेचा विकास करण्याचा निर्णय पालिकेने घेतला आहे. भूखंडांवर जॉगिंग ट्रॅक, मैदानाच्या संरक्षण भिंतीची आवश्यक ठिकाणी डागडुजी, संरक्षण भिंतीवर नवीन ग्रील, मैदानाची संपूर्ण रंगरंगोटी, हिरवळीची कामे, उद्यानातील शोभिवंत दिवे नवीन बसवणे, आसन व्यवस्था केली जाणार आहे. दहीसर पश्चिम येथे शेफ हॉटेलजवळच्या जागेचे सौंदर्यीकरण व विकास केला जाणार असून याअंतर्गत संरक्षण भिंतीची डागडुजी, लाल माती पसरणे, मुख्य प्रवेशद्वार, संरक्षण चौकी, स्वच्छतागृह व भूमिगत पाण्याची टाकी यांची निर्मिती करणे, गजेबो उभारणे, जॉगिंग ट्रॅकची निर्मिती करणे, संपूर्ण उद्यानास रंगरंगोटी, पर्जन्य जलवाहिनीची कामे, तसेच विद्युतीकरण व बागायतीच्या कामांचा समावेश आहे.

यांना मिळाले काम
सात कंत्राटदारांनी १२ ते २८ टक्के कमी दराने काम करण्याची तयारी निविदेत दर्शवली होती. पालिकेने या कामांसाठी ६ कोटी ७८ लाख रुपये कार्यालयीन अंदाज व्यक्त केला होता. लघुत्तम कंत्राटदार मे. इसबी एंटरप्रायजेस या कंत्राटदाराने २८.१५ टक्के कमी दराने दिलेला सुमारे ६ कोटींहून अधिक खर्चाचा देकार पालिकेने निविदा प्रक्रियेअंती स्वीकारला आहे.

वर्षभराचा कालावधी
नवीन उद्यानाची कामे पावसाळ्यासह ११ महिन्यांत पूर्ण करणे कंत्राटदाराला बंधनकारक आहे. कंत्राट कालावधी निश्चित करण्यात आला असल्याने कंत्राटात फेरफार केला जाणार नाही, असे प्रशासनाने स्पष्ट केले असून प्रस्तावास प्रशासकीय मंजुरी मिळाली आहे.