Navi Mumbai Crime: गोठवली गावात राहणाऱ्या एका व्यक्तीने इमारतीच्या बांधकामासाठी १५ ते २० वर्षे जुन्या असलेल्या आठ वृक्षांची बेकायदा कत्तल करण्यात आली आहे. नवी मुंबई महापालिकेने या वृक्षतोडीची गंभीर दखल घेऊन जमीन मालकासह जमिनीवर बांधकाम करणाऱ्या तिघांविरोधात गुन्हा दाखल केला आहे.

गोठवली गावातील रत्नदीप पार्केलगत असलेल्या १५ ते २० वर्षे जुन्या नारळाची पाच, आंब्याची दोन, जांभळाच्या एका झाडाची बेकायदा कत्तल केल्याची तक्रार ऑगस्ट २०२३ पालिकेच्या उद्यान विभागाकडे केली. या तक्रारीच्या अनुषंगाने पालिकेचे सहाय्यक आयुक्त तथा वृक्ष अधिकारी संजय तायडे यांनी प्रत्यक्ष जाऊन पाहणी केली असता झाडे तोडण्यात आल्याचे निदर्शनास आले.

याप्रकरणी गोठवली गावातील रतन म्हात्रे यांना कारणे दाखवा नोटीस बजावण्यात आली होती. मात्र, म्हात्रे यांनी महापालिका कार्यालयात कोणताही खुलासा दिलेला नाही. त्यामुळे याप्रकरणी पालिकेने चौघांविरोधात रबाळे पोलिस ठाण्यात गुन्हा दाखल केला आहे.

गोठवली गावात बेकायदा वृक्षतोड केल्याप्रकरणी चौघांविरोधात रबाळे पोलिस ठाण्यात गुन्हा दाखल करण्यात आला. तसेच त्यांनी वृक्षतोड करून त्याठिकाणी सुरू केलेल्या इमारतीच्या बांधकामालासुद्धा नोटीस बजावली आहे.
- संजय तायडे, सहाय्यक आयुक्त तथा वृक्ष अधिकारी, नवी मुंबई महापालिका