Ambarnath News: चोरी करण्यासाठी आल्याच्या संशयावरून दोन तरूणांना झालेल्या बेदम मारहाणीत दोघांचा मृत्यू झाला आहे. ही घटना शुक्रवारी (ता.१६) रात्री घडली.

याप्रकरणी १५ ते २० जणांना ताब्यात घेण्यात आले आहे. चौकशी करून आरोपींना अटक करण्यात येणार असल्याची माहिती पोलिसांनी दिली. सूरज परमार (वय२५) आणि सूरज कोरी अशी मृतांची नावे आहेत.

अंबरनाथ शहराच्या पूर्व भागातील दुर्गापाडा परिसरात शुक्रवारी (ता.१६) दोघा जणांना चोरी केल्याच्या संशयावरून काही लोकांनी पकडले. दोघांनाही मारहाण करत असताना जमाव वाढत गेला. तेव्हा जमावाने दोघांनाही लाठ्याकाठ्यांनी मारहाण केली.

यात दोघांचाही मृत्यू झाला आहे. घटनेची माहिती मिळताच शिवाजीनगर पोलिसांनी घटनास्थळी धाव घेतली. दोघांचे मृतदेह अंबरनाथच्या डॉ. बी.जी. छाया उपजिल्हा रुग्णालयात शवविच्छेदनासाठी पाठवण्यात आले.

याप्रकरणी १५ ते २० जणांना चौकशीसाठी ताब्यात घेण्यात आल्याची माहिती पोलिसांनी दिली. हत्याकांडाचा तपास शिवाजीनगर पोलिस आणि उल्हासनगर क्राईम ब्रांच यांच्याकडून सुरू आहे. दरम्यान मृत झालेले दोन्ही तरुण भुरटे चोर असल्याचे सांगण्यात येत असून ते दोघेही अंबरनाथच्या प्रकाश नगर परिसरात राहत असल्याचे पोलिसंनी सांगितले.

याबाबत खुनाचा गुन्हा दाखल करण्यात आला असून, तपासानंतर आरोपींना अटक करण्यात येईल, असे शिवाजीनगर पोलिस ठाण्याचे वरिष्ठ पोलिस निरीक्षक अशोक भगत यांनी सांगितले.