विरार, ता. १० (बातमीदार) : भारतीय इंग्रजीच्या जडणघडणीत अन्य भारतीय भाषांमधून आलेल्या शब्दसंपदेचा मोलाचा वाटा आहे. या शब्दसंग्रहांच्या समावेशामुळे ती अधिक समृद्ध होत गेली आहे, असे प्रतिपादन जर्मनीतील ड्रेस्डन युनिव्हर्सिटी ऑफ टेक्नॉलॉजी या विद्यापीठातील ‘इंग्रजी भाषाशास्त्र अभ्यास’च्या प्रमुख प्रा. डॉ. क्लॉडिया लांगं यांनी केले.
अण्णासाहेब वर्तक महाविद्यालयातील इंग्रजी विभागाने ‘भारतीय इंग्रजी’ या विषयावर आंतरराष्ट्रीय कार्यशाळेचे आयोजन केले होते. डॉ. क्लॉडिया यांनी ऐतिहासिक आढावा आणि तात्त्विक, तसेच संरचनात्मक मांडणी सादर केली. ब्रिटिशांच्या भारतातील आगमनानंतर इंग्रजी भाषेचा प्रचार-प्रसार देशात कसा होत गेला याचा आढावा त्यांनी घेतला. भारतीय इंग्रजीसंदर्भात केलेल्या मांडणीमध्ये त्यांनी अठराव्या शतकापासून वसाहत काळातील भारतातील भाषिक परिस्थितीचा इंग्रजी भाषेसंदर्भात आढावा घेतला.
कोणत्याही भाषेचा अभ्यास माणसाला अधिक शहाणे बनवतो आणि म्हणून भाषाशिक्षणाकडे विशेष लक्ष देण्याची गरज आहे, असे महाविद्यालयाचे प्राचार्य डॉ. अरविंद उबाळे यांनी प्रतिपादन केले. मुंबई विद्यापीठाच्या इंग्रजी विभागातील प्रा. डॉ. सचिन लबडे यांनी भारतीय भाषांवर इंग्रजीच्या पडणाऱ्या प्रभावाकडे तरुण पिढीने सकारात्मक पद्धतीने पाहावे असे सांगितले. जिवंत भाषाच परस्परांना प्रभावित करत असतात. भाषांमध्ये शब्द येतात-जातात, परंतु त्या माध्यमातून घडणारा परस्पर संवाद महत्त्वाचा असल्याचे त्यांनी सांगितले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.