Mumbai Metro: कुलाबा- वांद्रे- सीप्झ मुंबई मेट्रो-३ या भूमिगत मेट्रोतून प्रवास करताना प्रवाशांना मोबाईलची रेंज आणि इंटरनेट सेवेत अडथळा येऊ नये, यासाठी मुंबई मेट्रो रेल कॉर्पोरेशनने (एमएमआरसीएल) सौदी अरेबियाच्या एसीईएस या कंपनीच्या इंडिया प्रायव्हेट लिमिटेड या उपकंपनीशी करार केला आहे. त्यामुळे मेट्रो-३ साठी दूरसंचार पायाभूत सुविधा उपलब्ध होणार आहेत. सौदी अरेबियातील रियाध शहरात हा करार पार पडला.

कुलाबा-सिप्झ ही सुमारे ३३ किलोमीटर लांबीची मेट्रो मार्गिका भूमिगत आहे. त्यामुळे प्रवासादरम्यान प्रवाशांना मोबाईल रेंज आणि इंटरनेट कनेक्टिव्हिटी कशी मिळणार असा प्रश्न होता.

त्या पार्श्वभूमीवर एमएमआरसीएलच्या व्यवस्थापकीय संचालक अश्विनी भिडे, संचालक आर. रमणा आणि सौदीच्या संप्रेषण आणि माहिती तंत्रज्ञान मंत्रालय विभागातील दूरसंचार आणि पायाभूत सुविधांचे उपमंत्री बस्सम ए. अल-बस्सम, एसीईएसचे मुख्य कार्यकारी अधिकारी डॉ. अक्रम अबुरस यांच्या उपस्थित करार करण्यात आला.

मेट्रो-३ मार्गावर दरवर्षी ६२५ दशलक्षाहून अधिक प्रवाशांना २७ स्थानके, मेट्रो ट्रेन आणि फलाटावर या करारामुळे पुढील बारा वर्षे ४-जी आणि ५-जी कनेक्टिव्हिटी सहजपणे मिळणार आहे.