Navi Mumbai Crime: एटीएम मशीनमधून पैसे चोरणाऱ्या दोघांना रंगेहात पकडण्यात वाशी पोलिसांना यश आले आहे. अन्सार नायब अली आणि मोहम्मद शोएब जलील अहमद अशी आरोपींची नावे आहेत. वाशी सेक्टर १४ मध्ये रविवारी हा प्रकार उघडकीस आला होता. बँकेच्या व्यवस्थापकाच्या निदर्शनास आल्यामुळे ही चोरी उघड झाली.

वाशी सेक्टर १४ मधील एसबीआय बँकेच्या एटीएममध्ये बँकेचे व्यवस्थापक अरुण मिना हे रविवारी पैसे काढण्यासाठी गेले होते. तेव्हा एटीएम मशीनजवळ असलेल्या दोघा जणांच्या हालचाली त्यांना संशयास्पद वाटल्या. एटीएम मशीन निट पाहिले असता पैसे बाहेर येण्याच्या ठिकाणी एक प्लास्टिक प्लेट लावल्याचे त्यांना आढळून आले. याची माहिती मिना यांनी वाशी पोलिसांना दिली. त्यानंतर वाशी पोलिसांनी आरोपींना पकडण्यासाठी सापळा रचला.

साध्या वेशातील पोलिस एटीएमजवळ उभे असताना भावेश कुमार नावाची एक व्यक्ती एटीएममध्ये पैसे काढण्यासाठी आली. त्यांनी मशीनमधून वीस हजार रुपये काढले. बँकेतून पैसे डिडक्ट झाल्याचा त्यांना संदेश आला, पण पैसे बाहेर आलेच नाहीत. त्यामुळे भावेश कुमार एटीएम केंद्राच्या बाहेर येऊन उभे राहिले. त्याच वेळी बाहेर उभ्या असलेल्या दोन आरोपींपैकी एक जण आत गेला. त्याने अडकलेले वीस हजार घेतले आणि बाहेर आला. त्याच वेळी साध्या वेशात उभ्या असलेल्या पोलिसांनी दोन्ही आरोपींना ताब्यात घेतले.