सकाळ वृत्तसेवा
मुंबई, ता. १२ ः निवडून येण्याची क्षमता असलेले तुल्यबळ उमेदवार लोकसभा निवडणुकीत मुंबईत उतरवण्याचा निर्धार भाजप आणि शिवसेना ठाकरे गटाने व्यक्त केला आहे. मुंबईतील सहापैकी पाच जागा लढवण्याच्या तयारीत भाजप आहे. दुसरीकडे शिवसेना ठाकरे गट चार; तर काँग्रेस दोन आणि शिंदे गट एका जागेवर लढण्याची तयारी करीत आहे.

उत्तर मुंबईत भाजपचे गोपाळ शेट्टी विद्यमान खासदार आहेत. त्यांच्या वाढत्या वयाचे कारण सांगत त्यांच्या जागी केंद्रीय मंत्री पियूष गोयल यांना उमेदवारी देण्याच्या जोरदार हालचाली सुरू झाल्या आहेत, परंतु उमेदवार बदलल्यामुळे गोयल यांना मिळणाऱ्या मतांची टक्केवारी घटू शकते, अशी शक्यता व्यक्त केली जात आहे. गोयल हे माटुंगा येथे राहतात, असेही कारण यामागे सांगितले जात आहे; तर महाविकास आघाडीत हा मतदारसंघ काँग्रेससाठी सोडण्यात आला आहे. येथून ज्येष्ठ अभिनेते राज बब्बर यांच्या नावाची चर्चा सुरू आहे; मात्र अद्याप यावर शिक्कामोर्तब झालेले नाही.

उत्तर-मध्य लोकसभा मतदार संघ हा खासदार पूनम महाजन यांचा आहे. या मतदार संघातही उमेदवार बदलण्याचा भाजप विचार करत असल्याचे सांगितले जात आहे. येथून मुंबई भाजपचे अध्यक्ष आशिष शेलार यांच्या नावाची चर्चा सुरू आहे; तर महाविकास आघाडीकडून काँग्रेस नेते नसिम खान येथून लढण्याची शक्यता आहे. ईशान्य मुंबईत भाजपचे विद्यमान खासदार मनोज कोटक आणि पराग शहा यांच्या नावांची जोरदार चर्चा आहे. शिवसेना ठाकरे गटाकडून संजय दीना पाटील हे या मतदारसंघातून लढण्याची शक्यता आहे. दक्षिण मुंबई लोकसभा मतदार संघातून भाजपने अॅड. राहुल नार्वेकर यांना उमेदवारी देण्याचे जवळजवळ निश्चित झाले आहे. त्यांचा सामना शिवसेना ठाकरे गटाचे अरविंद सावंत यांच्याशी असणार आहे; तर दक्षिण-मध्य मुंबई ही एक जागा शिवसेना शिंदे गटाला सोडण्यात आली आहे. विद्यमान खासदार राहुल शेवाळे शिंदे गटाकडून लढणार आहेत; तर ठाकरे गटाचे अनिल देसाई त्यांच्याविरोधात उभे राहणार आहेत.
--
निरुपम भाजपचे उमेदवार?
उत्तर-पश्चिम मुंबई लोकसभा मतदार संघातून शिवसेना ठाकरे गटातून अमोल कीर्तिकर यांना उमेदवारी देण्यात येणार आहे. भाजकडून कोण उमेदवार असेल हे अद्याप स्पष्ट झालेले नाही. काँग्रेस नेते संजय निरुपम कीर्तिकर यांच्या उमेदवारीमुळे नाराज असल्याने ते भाजपमध्ये जाऊन निवडणूक लढवणार असल्याचे अंदाज बांधले जात आहेत. तसेच आशिष शेलार यांच्या नावाचीही येथून चर्चा आहे.