KharGhar news: मावळ लोकसभा मतदारसंघातील सर्वांत शेवटचे टोक असेलल्या खारघर शहरात एक लाखाहून अधिक मतदार संख्या आहे. खारघर शहरात मुख्यतः पाणी आणि मालमत्ता या दोन समस्यांच्या बाबतीत मतदारांमध्ये नाराजी आहे. पाच वर्षांत विद्यमान खासदारांनी कोणतीही महत्त्वाची विकासाची कामे केली नसल्याचे मतदारांचे म्हणणे आहे. ()

दरम्यान, महाविकास आघाडीकडूनही दुहेरी मालमत्ता कराच्या विरोधात आंदोलने झाली. विधानसभेत मालमत्ता कराचा प्रश्‍न उपस्थित केला; मात्र हाती काहीच लागले नाही. त्यामुळे येणाऱ्या लोकसभा निवडणुकीत मतदारांवर प्रभाव पाडण्यासाठी शिवसेना-भाजप युती आणि महाविकास आघाडीपैकी कोण आघाडी घेणार हे मतपेटीतून दिसणार आहे.

२०१७ मध्ये पार पडलेल्या पनवेल महापालिकेच्या पहिल्याच निवडणुकीत भाजपने एकहाती विजय मिळवून खारघरमधून बारा नगरसेवक निवडून आणले होते. पालिकेने २०१६ पासून मालमत्ता कर भरण्याचा ठराव आणल्यानंतर भाजपने कोणत्याही प्रकारचा विरोध केला नाही. विशेष म्हणजे खारघर वसाहत ही पनवेल महापालिकेतील सर्वांत मोठी वसाहत आहे. पालिकेने लादलेल्या दुहेरी मालमत्ता करामुळे आजही मतदारांत चीड आहे.

मतदारांनी निवडून दिलेल्या लोकप्रतिनिधींनी पाच वर्षांत भरीव विकासकामे केल्याचे दिसून येत नाही. विशेष म्हणजे मतदारांनी निवडून दिलेले लोकप्रतिनिधी मालमत्ता कराविषयी जनतेची बाजू न घेता पालिकेच्या बाजूने मत व्यक्त करताना दिसून आले.

पालिकेने लादलेल्या मालमत्ता कराच्या विरोधात नागरिक संतप्त असताना आणि जनतेची साथ असताना विरोधात असलेल्या महाविकास आघाडीतील शेकाप, शिवसेनाही वाढीव मालमत्ता कराच्या विरोधात तीव्र भूमिका घेताना दिसून आले नाहीत. त्यामुळे सत्ताधारी आणि विरोधक हे एकाच नाण्याच्या दोन बाजू असल्याची चर्चा नागरिकांमध्ये सुरू आहे.

पनवेल विधानसभा मतदारसंघात ४ लाख २३,७१६ मतदार आहेत. तसेच खारघर वसाहतीत १ लाख १४ हजार ६७२ मतदार असून त्यात ६१,८१४ पुरुष; तर ५२,८५७ महिला मतदार आहे

वर्चस्व दाखवून देण्यासाठी प्रयत्न

मावळ लोकसभा मतदारसंघातून शिवसेना युतीचे उमेदवार श्रीरंग बारणे हे उमेदवार आहेत. पुढील विधानसभेची निवडणूक ऑक्टोबर २०२४ मध्ये होणार आहे.

त्यामुळे पनवेल विधानसभा मतदारसंघातून जास्तीत मताधिक्य मिळवून देत पनवेलमध्ये भाजपचे वर्चस्व आहे हे दाखवून देण्यासाठी बूथ लेवलपर्यंत कार्यकर्त्यांची बैठक घेऊन प्रचाराला सुरुवात केली आहे.

तसेच महाविकास आघाडीकडून शिवसेना ठाकरे पक्षाचे रायगड जिल्हाप्रमुख शिरीष घरत हे निवडणूक लढवणार असल्याची चर्चा सुरू असून गेल्या वर्षभरापासून ते पक्षवाढीसाठी प्रयत्न करत आहेत.