सकाळ वृत्तसेवा
मुंबई, ता. ४ : विपुल प्रमाणात खनिजे असलेल्या कोकणात खोदकाम केलेल्या दगडखाणी उघड्या ठेवल्या जातात. या खाणींमध्ये पडून जीव गेल्याच्या अनेक घटना घडल्या आहेत. त्यामुळे अशा घटनांना जबाबदार असलेल्या खाणमालक आणि महसूल अधिकाऱ्यांवर कारवाई करण्यात यावी, अशी मागणी करणारी याचिका मुंबई उच्च न्यायालयात दाखल करण्यात आली आहे. या याचिकेवर मुख्य न्या. देवेंद्र कुमार उपाध्याय यांच्या खंडपीठासमोर १० एप्रिलला सुनावणी होणार आहे.
राज्याच्या महसूल आणि वन विभागाच्या २००९ च्या परिपत्रकाच्या अनुषंगाने रत्नागिरीच्या जिल्हाधिकाऱ्यांनी बंद तसेच चालू खाणीभोवती कुंपण घालण्याच्या सूचना खाणमालकास देण्याचे आदेश सर्व तालुक्यांच्या तहसीलदारांना दिले. प्रत्यक्षात स्थानिक पातळीवर कारवाई झालेली नाही. या प्रकरणी संबंधित खाणमालक, महसूल अधिकाऱ्यांवर कारवाईचे, तसेच उघड्या खाणींभोवती कुंपण वा इतर उपाययोजना करण्याचे निर्देश द्या, अशी मागणी करून निवृत्त लष्कर अभियंता अजित महाडिक यांनी ॲड. संतोष सितप, ॲड. रेश्मा ठिकार यांच्यामार्फत याचिका दाखल केली आहे. कोकणातील उघड्या खाणींमुळे होणाऱ्या जीवितहानीचा प्रश्न निर्माण झाला आहे. पावसाळ्यात उघड्या खाणींमध्ये पडून मनुष्यहानी होण्याचा धोका आहे. संभाव्य धोका लक्षात घेऊन न्यायालयाने तातडीने सुनावणी घ्यावी, अशी विनंती ॲड. दिलीप साटले यांनी केली. त्यावर मुख्य न्या. देवेंद्रकुमार उपाध्याय आणि न्या. आरिफ डॉक्टर यांच्या खंडपीठाने याची दखल घेत १० एप्रिलला सुनावणी निश्चित केली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.