Navi Mumbai News: महापे-शिळफाटा रोडने टेम्पोमधून जाणाऱ्या तीन बांगलादेशी नागरिकांना तुर्भे एमआयडीसी पोलिसांनी अटक केली आहे.

या कारवाईत पोलिसांनी टेम्पोही जप्त केला. अटक करण्यात आलेले तिघे बांगलादेशी नागरिक पालघर येथे मासेमारी व इतर कामे करून मागील काही वर्षापासून बेकायदेशीररीत्या भारतात वास्तव्य करत असल्याचे चौकशीत आढळून आले आहे.

महापे चेकपोस्ट येथून काही बांगलादेशी नागरिक शिळफाटा बाजूकडे जाणार असल्याची माहिती तुर्भे एमआयडीसी पोलिसांना मिळाली होती. त्यानुसार वरिष्ठ पोलिस निरीक्षक रवींद्र दौंडकर यांच्या सूचनेनुसार सहाय्यक पोलिस निरीक्षक नीलेश येवले व त्यांच्या पथकाने मंगळवारी रात्री महापे शिळफाटा रोडवर महापे चेकपोस्ट येथे वाहनांची तपासणी करण्यास सुरुवात केली होती.

रात्री सव्वा दहा वाजण्याच्या सुमारास संशयित टेम्पोची तपासणी केली असता, पोलिसांना टेम्पोत जाईल साबुद्दीन सरदार (वय ३४), अल्लाउद्दीन रज्जाक शेख (वय ४५) व अल्लाउद्दीन सुकथन मंडल (व ५३) हे तिघे बांगलादेशी नागरिक असल्याचे आढळले.

पोलिसांनी अधिक चौकशी केली असता, त्यांनी बांगलादेशातील गरिबीला कंटाळून अवैधरीत्या भारतात प्रवेश केल्याचे सांगितले. त्यानंतर पोलिसांनी गुन्हा दाखल करुन तिघांना अटक केली आहे.