Panvel News: साखरपुड्यासाठी आलेल्या विवाहितेच्या गळ्यातील सोने लुटण्याचा प्रयत्न रविवारी (ता. २८) दुपारी पनवेलमध्ये घडला; पण चोरांना अडीच लाखांच्या गंठणची पट्टी चोरण्यात यश आले असून याप्रकरणी पनवेल शहर पोलिस ठाण्यात जबरी चोरीचा गुन्हा दाखल आहे.

पनवेलमधील वहाळ गावात राहणाऱ्या प्रतीक्षा पाटील (२८) नात्यातील एका साखरपुड्यानिमित्त पती व मुलीसह पनवेलमध्ये आल्या होत्या. कार्यक्रमावेळी प्रतीक्षा यांनी २० तोळे वजनाची गंठण घातली होती.

दुपारी सव्वा तीनच्या सुमारास साखरपुड्याचा कार्यक्रम संपल्यानंतर प्रतीक्षा पती व मुलीसह कारच्या दिशेने पायी चालत जात होत्या. याचवेळी मोटारसायकलवरून आलेल्या एका लुटारूने प्रतीक्षा यांच्या गळ्यातील सोन्याचे गंठण जोरात हिसका देऊन खेचले. यावेळी गंठणची पट्टीच फक्त लुटारूंच्या हाताला लागली. याप्रकरणी पनवेल शहर पोलिस ठाण्यात तक्रार दाखल आहे.