नवी मुंबई, ता. ३० (वार्ताहर) : कोकण विभागीय आयुक्त डॉ. महेंद्र कल्याणकर यांची मुंबईत एसआरए विभागात बदली झाल्याने त्यांच्या जागी मुंबई महापालिकेतील अतिरिक्त आयुक्त (प्रकल्प) पी. वेलारसू यांची नियुक्ती करण्यात आली आहे. मंगळवारी (ता. ३०) वेलरासू यांनी कोकण विभागीय महसूल आयुक्तपदाचा कार्यभार स्वीकारला. या वेळी त्यांनी कोकण विभागीय कार्यालयासह महसूलच्या विविध विभागांची पाहणी केली. तसेच कोकण भवनमधील महत्त्वाच्या विभागांच्या विभागप्रमुखांशी चर्चा केली.
कोकण विभागात विकासाच्या दृष्टीने काम करण्यास भरपूर संधी आहे. कोकणातील नागरिकांना महसूल विभागातर्फे सुलभ सेवा देण्यासाठी माझे प्रयत्न राहतील. कोकण विभागातील अनुभवी अष्टपैलू अधिकारी आणि कर्मचाऱ्यांच्या सहकार्याने नागरिकांना सेवा पुरवण्यावर भर देणार असल्याचे नवनिर्वाचित आयुक्त पी. वेलरासू यांनी या वेळी सांगितले. वेलरासू हे २००२च्या भारतीय प्रशासन सेवेतील अधिकारी आहेत. जिल्हा परिषद मुख्य कार्यकारी अधिकारी, नाशिक व ठाणे जिल्हाधिकारी, महाराष्ट्र जीवन प्राधिकरणात सदस्य सचिव अशा महत्त्वाच्या पदांवर काम करण्याचा त्यांचा अनुभव आहे. पी. वेलरासू यांचे मास्टर्स इन पब्लिक अफेअर, पब्लिक पॉलिसी ॲनॅलिसीसचे शिक्षण कॅलिफोर्निया विद्यापीठातून झाले आहे. त्यांनी अर्थशास्त्रात पदव्युत्तर शिक्षण घेतले आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.