घणसोलीत अनधिकृत बांधकामांवर धडक कारवाई
वाशी, ता. २ (बातमीदार)ः नवी मुंबई महापालिका क्षेत्रातील घणसोली विभाग कार्यालयांतर्गत असणाऱ्या सिडकोच्या भूखंडावर अनधिकृत बांधकामांवर नुकतीच बेधडक कारवाई करण्यात आली. घणसोली विभाग कार्यालयातील रबाले स्टेशन रोड परिसरातील पाटील कंपाऊंड येथे सिडको व नवी मुंबई महापालिकेच्या संयुक्त विद्यामाने ही कारवाई करण्यात आली. या कारवाईमुळे अनधिकृत बांधकाम करणाऱ्यांचे धाबे दणाणले आहेत. रबाळे स्टेशन रोड परिसरातील पाटील कंपाऊंडजवळील घरमालक व विकसक केशव पाटील यांच्या वतीने अनधिकृत इमारतीचे काम सुरू होते. त्यामुळे पालिकेच्‍या घणसोली विभागामार्फत संबंधित बांधकामाला नोटीस बजावण्यात आलेली होती. मात्र तरीदेखील संबंधित मालकाकडून कोणतीही कार्यवाही करण्यात आलेली नव्‍हती. त्‍यामुळे अखेर महापालिकेने सदरील इमारतीवर कारवाई केली.