वाशी, ता. १ (बातमीदार) : शहरातील मोठे नाले व गटारे साफसफाईची कामे मार्गी लावण्याकरिता महापालिका आयुक्तांनी पुढाकार घेतला आहे. तसेच झाडांच्या फांद्या, धोकादायक ठरलेले वृक्ष तोडण्याबाबतही कार्यवाही सुरू करण्यात आली आहे. शहरात विविध ठिकाणी गटारातून काढलेला गाळ पदपथावरच अनेक दिवस पडून राहत असल्याचे आढळत असताना आता उद्यान विभागामार्फत झाडांच्या तसेच धोकादायक स्थितीमधील फांद्या छाटणीची कामे सुरू झाली आहेत. वृक्षछाटणीच्या फांद्या पदपथावर व रस्त्यावरच पडून राहत असल्याने त्याचा नागरिकांना अडथळा होऊ लागला आहे.
महापालिकेने पावसाळापूर्व कामे वेगाने सुरू केली असून मेअखेरपर्यंत कामे पूर्ण करण्यात येणार आहेत. गटारामधून निघालेली घाण जाड पॉलिथिन किंवा सिमेंटच्या गोण्यांवर टाकण्याकडे संबंधित ठेकेदाराचे दुर्लक्ष होत असते. गटारे व नाल्यातून बाहेर काढून ठेवण्यात येणारा गाळ एक ते दोन दिवसांनंतर सुकल्यानंतर लगेच उचलावा व काढलेला गाळ जाड पॉलिथिन किंवा सिमेंटच्या गोण्यांवर काढून ठेवावा, असे आदेश दिले असून याबाबत ठेकेदार मात्र दुर्लक्ष करतात. उद्यान विभागामार्फत वृक्षछाटणीबाबत विभागवार कार्यवाही सुरू करण्यात आली असून फांद्या रस्त्यावरच टाकल्या जात आहेत. त्याकडे दुर्लक्ष होत आहे. यामुळे पादचाऱ्यांना याचा त्रास सहन करावा लागत आहे.
------------
झाडांच्या फांद्या छाटल्यांनतर त्या हटवण्यात आल्या पाहिजे. यासंदर्भात पालिका कर्मचाऱ्यांकडे चौकशी करून फांद्या हटवण्याचे सुचित करण्यात येईल. तसेच कामात हलगर्जी केल्यास त्यांच्यावर योग्य ती कार्यवाही करण्यात येईल.
- सुनील पवार, अतिरिक्त आयुक्त, नवी मुंबई महापालिका
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.