कंत्राटी कर्मचाऱ्यांचे आंदोलन, एसएसजी इंजिनिअरिंगकडे केली मागणी
एकलहरे, ता. १ : राज्यात कामगार दिन व महाराष्ट्र दिनाचा कार्यक्रम सुरू असताना होत असलेल्या अन्यायाविरोधात एका कंत्राटी कामगाराने अर्धनग्न अवस्थेत आंदोलन केले. आपल्यावर होत असलेल्या अन्यायाविरोधात न्याय मिळावा, अशी मागणी त्यांनी यावेळी केली.
एस.एस.जी. इंजिनिअरिंग अँड कॉन्ट्रॅक्टर यांच्याकडे कामगार भगवान पाटील कामाला होते. मागील पाच महिन्यांत तीन महिन्यांपासून ऑर्डर बंद होती. त्यानंतर ऑर्डर सुरू होऊन दोन महिने झाले तरी जाणीवपूर्वक कंत्राटी कामगारांना कामावर घेतले गेले नाही. त्यामुळे कंत्राटी कामगार विशाल अहिरे, भगवान पाटील यांनी अर्धनग्न अवस्थेत प्रशासनाविरोधात आंदोलन केले.
अर्धनग्न अवस्थेत आंदोलन करत कंत्राटी कामगारांना कामावर पूर्ववत करण्यात तसेच कामगारांचा पूर्णपणे २५ टक्के दरमहा पीएफ भरण्यात यावा, ईएसआयसी कार्ड करण्यात यावे व पगारसुद्धा १० तारखेच्या आत कंत्राटी कामगारांना देण्यात यावा, अशी मागणी त्यांनी यावेळी केली. तसेच कंत्राटी कामगारांना कामावरून काढले जात असल्याने त्याकडेही यावेळी लक्ष वेधण्यात आले व कंत्राटी कामगारांना न्याय देण्याची मागणी केली आहे.