Palghar Loksabha News: पालघर मतदारसंघातून महायुतीत उमेदवार ठरता ठरत नव्हता. निवडणुकीसाठी उमेदवारी अर्ज भरण्यास अवघे दोन दिवस बाकी असताना आज हा मतदारसंघ पाच वर्षांनंतर पुन्हा भाजपकडे येणार असल्याचे संकेत उपमुख्यमंत्री देवेंद्र फडणवीस यांनी दिल्याने भाजपच्या गटात आनंद व्यक्त करण्यात येत आहे.

हा मतदारसंघ भाजपचा गड म्हणून ओळखला जात होता. हा मतदारसंघ निर्माण झाल्यावर झालेली पहिली निवडणूक बहुजन विकास आघाडीने जिंकली होती; परंतु त्यांतर मात्र या मतदारसंघावर भाजपचे वर्चस्व राहिले होते. मुख्यमंत्री एकनाथ शिंदे यांचे पुत्र श्रीकांत शिंदे यांनी या ठिकाणाहून पुन्हा राजेंद्र गावित हेच उमेदवार असल्याची घोषणा निवडणुका जाहीर झाल्यावर केली होती.

त्यावेळी येथील भाजप कार्यकर्त्यांनी त्याला विरोध केला होता. आता भाजप पुन्हा राजेंद्र गावित यांची घरवापसी करून त्यांना उमेदवारी देणार की नवीन नावाची घोषणा करणार, याकडे साऱ्यांचे लक्ष लागून राहिले आहे.

यातच देवेंद्र फडणवीस त्यांचे निकटवर्तीय असलेल्या विवेक पंडित यांच्या श्रमजीवी संघटनेच्या कार्यक्रमाला राजेंद्र गावित यांनी हजेरी लावल्याने तसेच दोन दिवसांपूर्वी गावित यांनी मध्यरात्री देवेंद्र फडणवीस यांची भेट घेतल्याने गावित पुन्हा भाजपमध्ये दाखल होणार असल्याचे संकेत मिळत आहेत.