वाडा, ता. ११ (बातमीदार) : सध्या लोकसभा निवडणुकीची रणधुमाळी सुरू असतानाच तालुक्यातील डाकिवली ग्रामपंचायतीच्या सरपंच दीपाली बंदरे आणि उपसरपंच नंदिनी गावळे, कार्यकर्ते नंदकुमार गावळे यांनी जिजाऊ संघटनेत प्रवेश केला. या प्रवेशामुळे डाकिवलीतील राजकीय समीकरण बदलेल, अशी चर्चा राजकीय वर्तुळात सुरू आहे.
वाडा तालुक्यातील डाकिवली हे अडीच हजार लोकवस्ती असलेले गाव आहे. या ग्रामपंचायतीत शिंदे गटाने एक हाती सत्ता स्थापन केली होती. राज्यात सत्तेत शिवसेना असतानाही तालुक्यातील ठराविक ग्रामपंचायतींना निधी दिला जात असल्याचा आरोप आहे. या ग्रामपंचायतीला म्हणावा तसा विकास निधी न दिल्याने ग्रामपंचायतीत नाराजी होती. या नाराजीतून सरपंच दीपाली बंदरे, उपसरपंच नंदिनी गावळे आणि कार्यकर्ते नंदकुमार गावळे यांनी समर्थकासह जिजाऊ संघटनेचे अध्यक्ष नीलेश सांबरे यांच्या उपस्थितीत जिजाऊ संघटनेत प्रवेश केला. या प्रवेशामुळे डाकिवली येथील राजकीय समीकरण बदलणार असून, जिजाऊ या गावात बाजी मारेल, असा विश्वास नंदकुमार गावळे यांनी बोलून दाखवला आहे.