Mumbai Crime: तीन दिवसांपूर्वी मालाड येथे झालेल्या वयोवृद्ध महिलेच्या हत्येचा पर्दाफाश मालाड पोलिसांनी केला. याप्रकरणी पळून गेलेल्या वैजू महादेव मुखिया (४५) या आरोपीस मालाड पोलिसांनी अटक केली.

त्यानेच शांताबाई सीताराम कुऱ्हाडे या ८९ वर्षांच्या वयोवृद्ध महिलेची चोरीच्या उद्देशाने हत्या केल्याचे तपासात उघडकीस आले आहे. अटकेनंतर त्याला बोरिवलीतील स्थानिक न्यायालयाने पोलिस कोठडी सुनावली आहे.

मालाड येथील सक्सेरिया कंपाऊंडजवळील चिचोंली विठ्ठलपाडा सुभाष डे चाळीत शांताबाई राहत होत्या. त्या भीक मागून उदरनिर्वाह चालवत असत. शुक्रवारी तिचा मृतदेह राहत्या घरात सापडला होता. याची माहिती स्थानिक रहिवाशांकडून समजताच मालाड पोलिसांनी घटनास्थळी धाव घेतली होती. मृतदेहाच्या शवविच्छेदन अहवालात महिलेच्या बरगडीसह डोक्याला मार लागल्याचे दिसून आले.

तिचा मृत्यू नैसर्गिक नसून तिची हत्या झाल्याचे तपासात उघडकीस आले होते. त्यामुळे शांताबाईचा नातू राजेश शिंदे याच्या तक्रारीवरून मालाड पोलिसांनी हत्येचा गुन्हा दाखल करून तपास सुरू केला होता.