बोर्डी, ता. ४ (बातमीदार) : पालघर लोकसभा मतदारसंघातील महायुतीपुरस्कृत उमेदवार हेमंत सवरा यांच्या विजयाचे बोर्डी परिसरातील भाजपच्या कार्यकर्त्यांनी स्वागत केले. असे असले तरी केंद्रामध्ये मात्र अपेक्षित यश नसल्याने कार्यकर्त्यांमध्ये उदासीनता दिसून आली. सवरा यांच्या विजयानिमित्ताने विजय मिरवणूक काढणार काय? असा प्रश्न केला असता एका कार्यकर्त्याने केंद्रात अपेक्षित यश मिळाले असते, तर समाधानाची बाब असती. परंतु निराशाजनक निकाल आल्यामुळे आमचा उत्साह मावळला आहे, असे सकाळशी बोलताना सांगितले. तरीही सर्व कार्यकर्त्यांना आणि तालुका पातळीवरच्या पदाधिकाऱ्यांना विचारून संध्याकाळी विजय मिरवणूक काढण्याचा निर्णय घेऊ, असेही त्यांनी स्पष्ट केले. दरम्यान, घोलवड ग्रामपंचायतीचे उपसरपंच आणि भारतीय जनता पक्ष युवा मंचचे तालुकाध्यक्ष कुणाल शहा यांनी विजयाचे स्वागत केले आहे. दरम्यान, महाविकास आघाडीच्या उमेदवार भारती कामडी आणि बविआचे राजेश पाटील यांच्या पराभवामुळे कार्यकर्त्यांमध्येही उदासीनता दिसून आली.