Mumbai News: लोकसभा निवडणुकीमुळे मुंबईतील नालेसफाईच्या कामांकडे दुर्लक्ष झाले आहे. त्यातच आता पावसाळा कधीही सुरू होण्याची शक्यता आहे. कंत्राटदारांनी नालेसफाईच्या कामाकडे दुर्लक्ष केले असून मुंबईतील बहुतांश नाल्यांची सफाई कामे अर्धवट असून मुंबई तुंबण्याचा धोका आहे.

पावसाळा तोंडावर आला असून पालिका प्रशासन नालेसफाईबाबत दावे करत आहे, मात्र ते दावे फोल असल्याची टीका राजकीय पक्षांकडून केली. अजूनही मोठ्या नाल्यांसह विभागांतर्गत छोट्या नाल्यांचीही सफाई झाली नसल्याची तक्रार नागरिकांची आहे. याबाबत विविध राजकीय नेत्यांनीही टीका केली आहे.

गाळाचे राजकारण
मुंबईतील नद्या आणि नाल्‍यांमधील गाळ काढण्‍यात आला तर काही नाले अजूनही गाळात आहेत. पालिकेचे वरिष्ठ अधिकारी शहर, पूर्व उपनगरे आणि पश्चिम उपनगरांतील नाल्‍यांतून गाळ काढण्‍याच्‍या कामांची पाहणी आणि तपासणीची जबाबदारी दिली होती. मात्र निवडणुकीमुळे ते शक्य झाले नाही. यामुळेच कंत्राटदारांनी कामचुकारपणा केला आहे.

प्लास्टिक कचरा अजूनही नाल्यात
नाल्यामध्ये थर्माकोल, प्लास्टिक पिशव्या, फर्निचर, रबर, रॕपर्स अशा विविध प्रकारच्या तरंगत्या वस्तूंनी नाले भरले आहेत. प्लास्टिकवर बंदी असूनही अनेकांकडून प्लास्टिकचा कचरा नाल्यात टाकताना दिसून येतात. त्यामुळे नाल्यातील पाण्याचा निचरा होण्यास अडथळे निर्माण होण्याचा धोका आहे.

भरती आणि जोरदार पावसाचा धोका
मुंबईत यावेळी जोरदार पर्जन्यवृष्टी होण्याचा इशारा हवानान खात्याने दिला आहे. त्यामुळे मोठी भरती आणि जोराचा पाऊस एकाच वेळी आल्यास त्याचा फटका मुंबईला बसण्याची शक्यता आहे. याचा परिणाम म्हणजेच मुंबई तुंबण्याचा धोकाही वर्तवला जात आहे.

नाल्यांवर जाळ्या नाहीत
नाल्यांमध्ये कचरा जाऊ नये यासाठी जाळ्या लावण्याचा पालिकेचा विचार होता. मात्र अजूनही जाळ्या लावल्या गेल्या नाहीत. त्यामुळे कचरा मोठ्या प्रमाणात नाल्यामध्ये टाकला जात आहे.