उल्हासनगर, ता. ८ (वार्ताहर) : दहा महिन्यांपासून रिक्त असलेले उल्हासनगर पालिकेतील अतिरिक्त आयुक्तांचे पद अखेर भरण्यात आले आहे. महाराष्ट्र सरकारने या पदावर किशोर गवस यांची दोन वर्षांच्या कालावधीसाठी प्रतिनियुक्ती केली आहे.
पालिकेमध्ये अतिरिक्त आयुक्तांची दोन पदे आहेत. एका पदावर जमीर लेंगरेकर कार्यरत आहेत. तर दुसरे अतिरिक्त आयुक्त डॉ. करुणा जुईकर यांची ५ सप्टेंबर २०२३ रोजी बदली झाली होती. तेव्हापासून हे पद रिक्त होते. मार्च महिन्यात किशोर गवस यांची उपायुक्तपदी नियुक्ती झाली आहे. ते परिवहन सेवेला आणि सार्वजनिक बांधकाम विभागातील प्रलंबित किंबहुना प्रगतिपथावर असणाऱ्या विकासकामांना गती देण्याचा प्रयत्न करत आहेत. आता त्यांची महाराष्ट्र सरकारने पदोन्नती करून त्यांच्याकडे अतिरिक्त आयुक्त पदाची जबाबदारी सोपवली आहे. त्यामुळे गवस हे आयुक्त अजीज शेख यांच्या मार्गदर्शनाखाली अनेक नागरी समस्या मार्गी लावणार, असे चित्र दिसू लागले आहे.