परळ येथे झाड कोसळून महिलेचा मृत्यू

मुंबई, ता. २ ः पावसाचा जोर अद्याप वाढलेला नसताही मुंबईत झाडे पडण्याच्या घटना सुरू झाल्या आहेत. वरळीतील जांभोरी मैदान येथे झाड पडून एकाचा मृत्यू झाल्याची घटना ताजी असताना आज (ता. २) परळ बेस्ट एसटी आगाराजवळ सयानी मार्गावर झाड कोसळून झालेल्या दुर्घटनेत एका कचरावेचक महिलेचा मृत्यू झाला. लागोपाठ घडलेल्या या घटनांमुळे नागरिकांच्या सुरक्षेचा प्रश्न ऐरणीवर आला आहे. वर्षा कांतिलाल मेस्त्री (५७) ही कचरावेचक महिला पडलेल्या झाडाखाली अडकली. स्थानिकांनी सुटका करून तिला जवळच्या केईएम रुग्णालयात उपचारासाठी दाखल केले; मात्र गंभीर जखमी झाल्याने या महिलेचा मृत्यू झाल्याचे डॉक्टरांनी घोषित केले.