पोलिसाच्या कानशिलात लगावली
अंधेरी, ता. ३ (बातमीदार) ः बार ॲण्ड रेस्ट्रॉरंटमधील हुक्का तपासणीला विरोध करून बारच्या व्यवस्‍थापकाने पोलिस शिपायाच्या कानशिलात लगावल्‍याची घटना रविवारी (ता. ३०)अंधेरीत घडली. याप्रकरणी गुन्हा नोंद होताच जॉएल नॉरबट फर्नांडिस याला आंबोली पोलिसांनी अटक केली. त्याला अंधेरीतील स्‍थानिक न्यायालयाने पोलिस कोठडी सुनावली आहे.
ही घटना अंधेरीतील विरा देसाई रोड, लिटील डोअर हॉटेल ॲण्ड बारमध्ये घडली. समाधान बापूराव पाटील हे कल्याणच्या मलंग रोड, नांदिवली परिसरात राहत असून आंबोली पोलिस ठाण्यात पोलिस शिपाई म्हणून कार्यरत आहेत. रविवारी रात्री उशिरा अकरा वाजता आंबोली पोलिसांचे एक विशेष पथक या बारमध्ये गेले होते. हुक्का पार्लर सुरू आहे का, याची पोलिसांकडून तपासणी सुरू होती. कारवाईदरम्‍यान फर्नांडिसने सरकारी कामात अडथळा आणण्याचा प्रयत्न केला होता. पोलिसांना शिवीगाळ व धक्काबुक्की करून पोलिस शिपाई समाधान पाटील यांच्या कानशिलात लगावली. या प्रकारानंतर तिथे उपस्थित पोलिसांनी जॉएलला चौकशीसाठी ताब्यात घेऊन पोलिस ठाण्यात आणले.