भारतीय हवामान विभागाच्या अंदाजानुसार, बंगालच्या उपसागरात कमी दाबाचे क्षेत्र निर्माण झाले आहे. परिणामी, पश्चिमी वाऱ्यांचा जोर वाढल्याने महाराष्ट्राच्या काही भागात पुढील चार ते पाच दिवस मुसळधार पावसाची शक्यता आहे. तसेच, अरबी समुद्रसपाटीपासून दक्षिण गुजरात-उत्तर केरळ किनारपट्टीवरही कमी दाबाचा पट्टा सक्रिय झाला आहे, त्यामुळे संपूर्ण कोकण आणि लगतच्या घाटात तुरळक ठिकाणी जोरदार ते अत्यंत जोरदार पाऊस पडण्याची शक्यता आहे.

पालघर जिल्ह्यातही शुक्रवारी (ता. १९) सतर्कतेचा इशारा देत काही ठिकाणी जोरदार ते अतिजोरदार पावसाचा अंदाज वर्तवण्यात आला आहे. २० ते २२ जुलैदरम्यानही तुरळक ठिकाणी पावसाचा जोर कायम राहण्याची शक्यता हवामान विभागाकडून वर्तवण्यात आली आहे.

जुलैमध्ये सरासरीपेक्षा जास्त पाऊस पडेल, असा अंदाज हवामान विभागाने १ जुलै रोजी वर्तविला होता. महावेधच्या आकडेवारीनुसार, पालघर जिल्ह्याचा १ ते १८ जुलैपर्यंत सरासरी पाऊस ५२५.५ मिमी आहे, तर यावर्षी ५५२.५ मिमी (१०५.१ टक्के) पावसाची नोंद झाली आहे, अशी माहिती कृषी विज्ञान केंद्र, कोसबाड हिल येथील कृषी हवामान शास्त्रज्ञ रिझवाना सय्यद यांनी दिली.

मुसळधार पावसामुळे रस्त्यांवर पाणी साचल्याने प्रामुख्याने शहरांमधील वाहतूक विस्कळित होऊ शकते. ज्या भागात पाणी साचण्याची समस्या वारंवार भेडसावते त्या भागात जाणे टाळावे, असे आवाहन करण्यात आले आहे. ग्रामीण भागात कच्चे रस्ते व घरांचे नुकसान होण्याची शक्यता असते. अतिजोरदार पावसामुळे काही भागात बागायती व नवीन पिकांचे नुकसान होण्याचे टाळता येणार नाही, तसेच काही नद्यांच्या पाणलोट क्षेत्रात नदीला पूर येऊ शकतो.

शेतकऱ्यांनी भातलावणी झाली असल्यास भातशेतातील अतिरिक्त साचलेले पाणी बाहेर काढण्यासाठी खोल चर करून घ्यावे. औषध फवारणी व खते देण्याची कामे पुढे ढकलावीत, भाताची पुनर्लागवड, फळझाडे व भाजीपाल्याची नवीन लागवड करणे टाळावे. जनावरांना सुरक्षित ठिकाणी ठेवण्याची व्यवस्था करावी, असा सल्ला कृषी विज्ञान केंद्र, कोसबाड हिल येथील प्रमुख डॉ. विलास जाधव यांनी दिला आहे.