Mumbai: सचिन तेंडुलकर यांचे प्रशिक्षक रमाकांत आचरेकर यांच्या स्मारकाच्या प्रस्तावाला महाराष्ट्राच्या नगरविकास विभागाने बुधवारी (ता.२८) मंजुरी दिली. राज्य सरकारने जाहीर केलेल्या परिपत्रकात शिवाजी पार्कच्या गेट ५ जवळ १.८ मीटर क्यूब स्ट्रक्चर उभारण्याची योजना आहे.

या स्मारकाच्या देखभालीची जबाबदारी बी. व्ही. कामत मेमोरियल क्रिकेट क्लबकडे देण्यात आली आहे आणि त्यासाठी सरकारकडून कोणतेही आर्थिक योगदान दिले जाणार नाही. शिवाजी पार्क जिमखान्याचे सहाय्यक सचिव सुनील रामचंद्रन यांनी स्मारकासाठी पुढाकार घेतला आहे.

रामचंद्रन म्हणाले, ‘‘रमाकांत आचरेकर सरांनी भारताला १३ क्रिकेटपटू दिले आहेत. ते जास्त प्रसिद्धीच्या झोतात नव्हते आणि सचिन तेंडुलकर चमकला तेव्हाच त्यांना प्रसिद्धी मिळाली.’’