Navi Mumbai: नेरुळ पोलिसांनी सेक्टर १६ मधील एका रो हाऊसवर सोमवारी सायंकाळी छापा मारून तब्बल २ कोटी ६६ लाख ७१ हजाराची रोख जप्त केली आहे. विधानसभा निवडणुकीच्या पार्श्वभूमीवर ही कारवाई करण्यात आली.

विधानसभा निवडणुकीच्या कालावधीत कायदा व सुव्यवस्था राखण्यासाठी नवी मुंबई पोलिसांकडून प्रयत्न सुरू आहेत. निवडणूक आयोगाकडून लागू केलेल्या आदर्श आचारसंहितेचे काटेकोर पालन व्हावे, यासाठी नवी मुंबई पोलिसांकडून विशेष खबरदारी घेतली जात आहे. त्यासाठी विशेष पथके तयार करण्यात आली आहेत.

नेरुळ सेक्टर -१६ मधील एका रो हाऊसमधील इंद्रपाल यादव याच्या घरामध्ये बेकायदेशीर रोकड असल्याची माहिती नेरूळ पोलिसांना मिळाली होती. या माहितीच्या आधारे सोमवारी सायंकाळी घराची झडती घेण्यात आली.

यावेळी घरामध्ये २ कोटी ६६ लाख ७१ हजारांचा बेकायदेशीर रोकड सापडली. इंद्रपाल यादव यांनी पैशांबाबत दिलेली माहिती विसंगत असल्याने पोलिसांनी याबाबतची माहिती निवडणूक आयोगाला दिली. तसेच इंद्रपाल यादवला चौकशीसाठी ताब्यात घेतले आहे.