ठाणे - मागील दोन दिवसापासून कोसळणाऱ्या मुसळधार पावसामुळे जिल्ह्यातील सर्वच नद्यांनी धोक्याची पातळी ओलांडली असून दुधडी भरून वाहू लागले आहे. अशातच मुरबाड तालुक्यातील टाकीची वाडी येथील दोघेजण वाहून गेल्याची घटना गुरुवारी दुपारी ३ ते ३.३० वाजेच्या दरम्यान घडली आहे. या घटनेची माहिती मिळताच महसूल विभाग, पोलीस व आपत्ती व्यवस्थापन यंत्रणा तसेच अग्निशामक दलाच्या जवानांकडून घटनास्थळी धाव घेवून शोधकार्य सुरू केले आहे.

ठाणे जिल्ह्यातील धरण क्षेत्रात मागील काही दिवसांपासून पावसाने दमदार हजेरी लावली आहे. अशातच मागील दोन दिवसापासून पावसाचा जोर वाढल्याने धरणांच्या पातळीत वाढ होवून पाण्याचा पाण्याचा विसर्ग करण्यात येत आहे. तर, उल्हास आणि काळू या नद्यांनी इशारा पातळी ओलांडली असून या नद्यांच्या काठावरील गावांना सतर्कतेचा इशारा दिला आहे.

तर, अंबेक गावातील नागरिकांचे स्थलांतर करण्यात आले आहे. अशातच गुरुवारी दुपारी ३ ते ३.३० च्या दरम्यान, टाकीचा पाडा येथील रहिवाशी गणेश चिंधू केणे (३५) राहणारा डोंगरनाव्हे व ज्ञानेश्वर बुधाजी गोंधळी (३५) राहणार शास्त्रीनगर (दुधाळेपाडा) हे दोघे बारावी धरणाच्या बॅक वॉटरमध्ये वाहून गेल्याची घटना घडली.

या घटनेची माहिती मिळताच महसूल विभाग, पोलीस व आपत्ती व्यवस्थापन यंत्रणा तसेच अग्निशामक दलाच्या जवानांकडून घटनास्थळी धाव घेत शोधकार्य सुरु केले असल्याची माहिती तहसीलदार संदीप आवरी यांनी दिली. मात्र, हे दोघे कशासाठी त्या ठिकाणी गेले होते, हे मात्र, अद्याप समजू शकले नाही.

७७ वर्षीय आजी बाई जखमी

मुसळधार पावसामुळे शहापूर तालुक्यातील मौजे शेरे येथील घर पडून गुलाब बाळू उबाळे (७७) वर्षे या आजीबाई जखमी झाल्या असून त्यांना तातडीने प्राथमिक आरोग्य केंद्र वासिंद येथे उपचारासाठी दाखल करणेत आले असल्याची माहिती जिल्हा आपत्ती व्यवस्थापन विभागाने दिली.