उल्हासनगर - आईने मुलाला जेवणासाठी फोन केल्यावर काही वेळातच तिला तिच्या मुलाचा इमारतीच्या चौथ्या मजल्यावरून पडून मृत्यू झाल्याची बातमी मिळाल्याची हृदयद्रावक आणि तेवढीच खळबळजनक घटना उल्हासनगरात घडली आहे.

शहरातील पवई चौक परिसरात विकास टॉवरमध्ये कुटुंबासोबत राहणारा 22 वर्षीय शाहिल गौतम शाह याचा श्रीराम चौकात व्यवसाय होता. शुक्रवारी रोजच्या प्रमाणे शाहिल घरातून दुकानावर गेला होता. शाहिल दुपारी घरी जेवणासाठी परतला नाही, म्हणून त्याच्या आईने त्याला फोन करून जेवण करण्यासाठी घरी येण्यास सांगितले.

तेव्हा शाहिलने तिला काही वेळात येतो असे सांगून फोन ठेवला. मात्र संध्याकाळी तिला धक्कादायक बातमी कळाली की, शाहिल पवई चौकातील कमला इमारतीच्या चौथ्या मजल्यावरून खाली पडल्याने त्याचा मृत्यू झाला आहे.

घटनेची माहिती मिळताच, स्थानिकांनी मध्यवर्ती पोलिसांना कळवले. पोलिसांनी घटनास्थळी धाव घेत शाहिलचा मृतदेह ताब्यात घेतला आणि शवविच्छेदन करण्यासाठी शासकीय रुग्णालयात पाठवला. प्राथमिक तपासात मृतकाच्या कपड्यांवर संशयास्पद खुणा आढळल्या आहेत. शाहिलच्या कपड्यांचे बटण तुटलेले होते, गळ्यावर जखमेचे निशाण होते, तसेच कमरपट्टा देखील तुटलेला होता. त्यामुळे हा संशयास्पद मृत्यू असल्याचा संशय मयत शाहिलचा मोठा भाऊ राहुल शाह याने व्यक्त केला आहे. शाहिलच्या मोबाईलचा रेकॉर्ड तपासला तर काहीतरी नक्कीच समोर येण्याची शक्यता देखील राहुलने व्यक्त केली आहे.

त्यानुषंगाने पोलीस उपायुक्त सचिन गोरे, सहायक पोलीस आयुक्त अमोल कोळी यांच्या मार्गदर्शनाखाली मध्यवर्ती ठाण्याचे वरिष्ठ पोलीस निरीक्षक शंकर आवताडे, सहायक पोलीस निरीक्षक सुधर्म सावंत यांनी शाहिलचा मृत्यू हा अकस्मात झाला की त्याने आत्महत्या केली की त्याची हत्या करण्यात आली या दिशेने तपासला गती दिली आहे.