Uran News: उरण तालुक्यातील चाणजे ग्रामपंचायतीच्या हद्दीतील सर्वांत मोठे गाव समजल्या जाणाऱ्या करंजा गावात पाण्याचे दुर्भिक्ष असल्‍याने ग्रामस्‍थ मेटाकुटीला आले आहेत. कित्येक वेळा आंदोलन, मोर्चे काढून गावातील पाणी प्रश्न सुटत नसल्याने ग्रामस्‍थांकडून रोष व्‍यक्‍त केला जात आहे.

उरण शहरापासून अगदी काही अंतरावर असणाऱ्या करंजा गावातील ग्रामस्‍थांना पाणीटंचाईचा सामना करावा लागत आहे. पंधरा दिवसांतून एकदा पाणी येत असल्याने ग्रामस्थांचे पाण्याविना हाल होत आहेत. गेल्या कित्येक वर्षांपासून करंजा गावातील नागरिकांच्‍या पाणी प्रश्नावर अद्यापही तोडगा काढण्यात आलेला नाही.

त्यामुळे ग्रामस्थांकडून संताप व्यक्त केला जात आहे. आणखी किती वर्षे पाणीटंचाई सहन करायची, असा सवाल करंजा येथील ग्रामस्‍थ करत आहेत. करंजा-कोंढरी परिसर हा उरण तालुक्यातील सर्वांत मोठ्या चाणजे ग्रामपंचायतीचा भाग आहे. या भागामध्ये जवळजवळ २५ ते ३० हजार लोकसंख्या आहे. एकीकडे शासनाच्या माध्यमातून ‘हर घर जल’ ही योजना राबवली जात आहे; तर दुसरीकडे करंजा ग्रामस्थांना मात्र पाणी प्रश्नासाठी जीवाचा आटापिटा करावा लागत आहे; मात्र तरीही प्राणी प्रश्न काही सुटत नसल्यामुळे ग्रामस्‍थ मेटाकुटीला आले आहेत.

करंजा ग्रामस्थांनी अनेकदा पाणी टंचाईविरुद्ध अनेक आंदोलने केली आहेत. यामध्ये करंजा ग्रामस्थांच्या माध्यमातून पाणीटंचाईप्रकरणी रोष व्यक्त करण्यासाठी मतदानावर बहिष्कार घालण्यात आला होता. त्याचप्रमाणे गेल्या वर्षी मार्च महिन्यात उरण तहसील कार्यालयावर हंडा-कळशी मोर्चादेखील काढण्यात आला होता; मात्र लोकप्रतिनिधी तसेच शासनाकडून नुसते आश्‍वासन देण्यात येते.

गावातील नागरिक पाणी प्रश्नामुळे अत्यंत त्रस्‍त झाले आहेत. त्यामुळे पाणी विकत घेण्याची वेळ नागरिकांवर येत आहे. पंधरा दिवसांतून एकदा येणारे पाणी यामुळे पाण्याचे नियोजन कसे करावे, ही सगळ्यात मोठी समस्या आहे. विशेष म्हणजे लोकप्रतिनिधी व शासनाच्या माध्यमातून अजूनही आमच्या गावाचा पाणी प्रश्न सुटलेला नाही.
प्रीतम म्हात्रे, ग्रामस्थ, करंजा.