मुंबई : राष्ट्रद्रोहाचा आरोप असलेल्या शेरजिल इमामच्या समर्थनार्थ घोषणाबाजी करणाऱ्या ऊर्वशी चुडावालाला आज मुंबई उच्च न्यायालयाकडून अटकेपासून अंतरिम दिलासा मिळाला. ऊर्वशीच्या विरोधात आझाद मैदान पोलिसांनी राष्ट्रद्रोहाचा गुन्हा नोंदविला आहे. 

महत्वाची बातमी ः दिल्ली निकालानंतर उद्धव ठाकरेंनी 'असा' लगावला भाजपाला टोला

या प्रकरणात ऊर्वशीने अटक होण्याच्या शक्‍यतेमुळे न्यायालयात अटकपूर्व जामिनासाठी अर्ज केला होता. यावर आज न्या. संदीप शिंदे यांच्यापुढे सुनावणी झाली. त्या वेळी न्यायालयाने ऊर्वशीला मुंबई आणि ठाणे परिक्षेत्राबाहेर जाऊ नये, मोबाईल फोन पोलिसांकडे सुपूर्द करावा आणि पोलिस चौकशीला उद्या आणि परवा (ता. 12 आणि 13) सकाळी अकरा ते दोन या वेळेत हजर राहावे, असे आदेश दिले. तसेच त्यानंतर पोलिस जेव्हा बोलावतील, तेव्हा हजर व्हावे, असेही निर्देश न्यायालयाने दिले आहेत. पोलिसांनी अटक केल्यास 20 हजार रुपयांच्या वैयक्तिक जात-मुचलक्‍यावर सुटका करण्याचे आदेशही न्यायालयाने दिले आहेत. घोषणाबाजीमधून अर्जदाराची विचारधारा स्पष्ट होत नाही, असे मतही न्यायालयाने नोंदविले. 

महत्वाची बातमी ः राज ठाकरेंच्या सभेनंतर मनसैनिकांनी आझाद मैदानात केलं...

आझाद मैदानावर झालेल्या आंदोलनावेळी ऊर्वशीने शेरजिलच्या समर्थनार्थ घोषणाबाजी केली होती. त्याचा व्हिडीओ समाजमाध्यमावर व्हायरल झाला होता. याविरोधात पोलिसांनी राष्ट्रद्रोहासह विविध आरोपांखाली गुन्हा नोंदविला आहे. तसेच ऊर्वशीने तिचे समाजमाध्यमावरील खाती बंद करून पुराव्यांमध्ये छेडछाड केल्याचा आरोप पोलिसांनी केला. मात्र, कोणत्याही प्रकारची देशविरोधी मानसिकता नसून केवळ समाजमाध्यमावरील पोस्ट मी शेअर केली होती, मी कोणतीही पोस्ट केली नाही, असा बचाव तिच्या वतीने करण्यात आला आहे. याचिकेवर पुढील सुनावणी 24 फेब्रुवारी रोजी होणार आहे. 
---- 
मार्गदर्शक तत्त्वांची पूर्तता नाही 
दरम्यान, राष्ट्रद्रोहाचा गुन्हा दाखल करण्यापूर्वी उच्च न्यायालयाने निर्देशित केलेल्या मार्गदर्शक तत्त्वांचे पालन करणे पोलिसांसाठी बंधनकारक आहे. यानुसार जिल्हा विधी अधिकारी आणि सरकारी वकिलांचे मत असणे आवश्‍यक आहे. मात्र या मार्गदर्शक तत्त्वांची पूर्तता केली नसल्याचे मत न्यायालयाने आज सुनावणीत व्यक्त केले.