मुंबईत सध्या गेल्या चोवीस तासापासून सातत्यानं संततधार पाऊस सुरु आहे. यामुळं मुंबईतील जनजीवन अक्षरशः विस्कळीत झालं आहे. त्यातच या सातत्यानं पडणाऱ्या पावसामुळं विधानसभेचे विरोधीपक्ष नेते विजय वडेट्टीवार यांच्या शासकीय बंगळ्याचं छत गळायला लागलं आहे. त्यामुळं त्यांच्या हॉलमध्ये अक्षरशः बादल्या ठेवण्याची वेळ आली आहे. याचा व्हिडिओ देखील समोर आला आहे.

मुंबईतल्या पावसानं आता नागरिक हैराण झाले आहेत तर दुसरीकडं वडेट्टीवार हे देखील त्रास्त झाल्याचं दिसून आलं आहे. कारण मुंबईत राहत असलेल्या सरकारी निवासस्थानाचं छत पावसामुळं गळायला लागलं आहे. सिलिंगला करण्यात आलेल्या पीओपीमध्ये बसलेल्या बल्बच्या सॉकेटमधून पाण्याची गळती होत आहे. त्याचबरोबर पंख्यातूनही पावसाच्या पाण्याची गळती होत असल्याचं समोर आलं आहे.

सातत्यानं छतामधून पाणी टपकत असल्यानं वडेट्टीवारांच्या घराच्या हॉलमध्ये बादल्या ठेवण्यात आल्या आहेत. याबाबत आपण संबंधीत यंत्रणेकडं तक्रार केलेली आहे पण अद्याप त्यांनी दुरुस्तीचं काम केलेलं नाही, असं वडेट्टीवार यांनी साम टीव्हीशी बोलताना सांगितलं. वडेट्टीवार म्हणाले की, "दहा दिवस झाले माझा टेलिफोन बंद आहे, घर गळत आहे. कुणाचंच याकडं लक्ष नाही, यांचं लक्ष कुठे आहे हे महाराष्ट्रातील जनतेपासून लपून राहिलेलं नाही. टेंडर काढणं कमिशन खाणं याकडं याचं लक्ष आहे हे आता स्पष्ट झालेलं आहे"

मुंबई शहरात होत असलेल्या या कामांमधून सरकारच्या कारभारावर प्रश्नचिन्ह उपस्थित होत आहे. हे धोकेबाज सरकार सत्तेत आल्यापासून महाराष्ट्रातील लोकांना त्रास होत आहे, तिथं आमचा त्रास काय? अशा शब्दांत वडेट्टीवार यांनी सरकारला टोला लगावला आहे.