मुंबई : आज सकाळी कोसळलेल्या जोरदार पावसामुळे विक्रोळी कन्नमवारनगर येथील बेस्ट चौकीत  पाणी शिरल्याने वाहक व चालक यांचे हाल झाले. सखल भागात असलेल्या या चौकीत पाणी भरत असल्याने बेस्ट वाहक आणि चालकांच्या आरोग्याचा प्रश्न निर्माण झाला आहे. बेस्ट उपक्रमाकडे याबाबत तक्रार करुनही दुर्लक्ष केले जाते, असा आरोप कामगारांनी केला आहे. 

हेही वाचा: "मै लष्कर ए तोयबा से सुलतान बोल रहा हूँ"; ताज हॉटेलला आले धमकीचे २ फोन..पोलिसांनी केला गुन्हा दाखल..

बेस्ट उपक्रमातील ५०० हुन अधिक कामगारांना कोरोनाची लागण झाली असून १० कामगारांचा मृत्यू झाला आहे. तरीही जीवाची पर्वा न करता कामगार आपली जबाबदारी पार पाडत आहेत. दिवस रात्र सेवा देणा-या कोरोना योद्धा म्हणून बेस्ट कामगारांचे सर्वचस्तरातून कौतुक केले जात आहे. 

मात्र याच कामगारांना सुविधा देण्याकडे बेस्ट उपक्रम दुर्लक्ष करते आहे. कन्नमवार येथे बेस्ट कामगारांसाठी चौकी आहे. या चौकीत सलग तीन दिवस पडलेल्या पावसामुळे पाणी शिरल्याने कामगारांचे हाल होत आहेत. आधीच कोरोनाचा धोका त्यात साचलेल्या पाण्यात लेप्टो, मलेरिया, डेंग्यू अशा विविध आजारांचा धोका निर्माण झाला आहे. 

हेही वाचा: मुंबईत ‘सिरो’ सर्वेक्षणातून कोरोनाच्या संक्रमणाचा कल कळू लागला; आतापर्यंत रक्ताच्या 'इतक्या' नमुन्यांचे संकलन..

देशभरात स्वच्छता अभियान राबविण्यात येत आहे. परंतु बेस्ट उपक्रमाला कामगारांचा विसर पडलेला दिसून येतो. कन्नमवारनगर बेस्ट चौकीत स्वच्छता अभियान कागदावरच असल्याचे दिसून येते. चौकीत पावसाचे पाणी शिरल्याने नीट बसता येत नाही, गुडघाभर पाण्यात बसून रहावे लागते, पिण्याच्या पाण्याची टाकीची दुरवस्था झाली आहे. कामगारांच्या आरोग्याची काळजी घेण्यासाठी तातडीने उपाययोजना कराव्यात, अशी मागणी  केली जात आहे.
water filled in best chowki in vikroli read full story