मुंबई: वीकेंड लॉकडाऊनमध्ये नियम तोडल्याप्रकरणी मुंबईत दोन दिवसांच्या कालावधीत एकूण 427 जणांविरोधात गुन्हे दाखल करण्यात आले. वीकेंड लॉकडाऊनसाठी मुंबईतील विविध भागात नाकाबंदी करण्यात आली होती. त्यापू्र्वी पाच दिवसात नियम भंगाचे 123 गुन्हे दाखल करण्यात आले होते. पण वीकेंड लॉकडाऊनच्या दोन दिवसांत मुंबईत 427 जणांना पोलिसांच्या लाठ्यांचा सामना करावा लागला. शनिवारी 226 तर रविवारी 201 जणांविरोधात नियमभंगाचे गुन्हे दाखल करण्यात आले. त्यातील अनुक्रमे 155 व 166 जणांना अटक करून जामिनावर सोडण्यात आले. तर 95 जणांना नोटीस देऊन सोडण्यात आल्याची माहिती पोलिसांनी दिली.

मुंबईकरांनो जरा जपून.... वाचा चिंता वाढवणारी बातमी

मुंबई पोलिस आयुक्त हेमंत नगराळे यांनी लॉकडाऊनपूर्वी पोलिसांशी संपर्क साधून संचारबंदी काळात नागरिकांशी सौजन्याने वागा, कोणाला उठाबशा काढायला लावू नका, कोणावर लाठीही उगारू नका, अशा सक्त सूचना दिल्या होत्या. त्यानुसार पोलिसांनी लाठीचार्ज वगैरे सारखे प्रकार केले नाहीत. शहरात दीडशेहून अधिक ठिकाणी नाकाबंदी करण्यात आली होती. पोलिसांच्या साप्ताहिक सुट्या रद्द करण्यात आल्या होत्या. नाकाबंदीच्या वेळी संशयित गाड्यांची तपासणी करण्यात येत होती. काही ठिकाणी दुकानदारांनी दुकाने सुरू ठेवली होती. त्यांच्यावर काही ठिकाणी कारवाई करण्यात आली. रविवारीही असाच कडक बंदोबस्त ठेवण्यात आला होता.

लॉकडाउनसंबंधी मंत्री एकनाथ शिंदे यांचं महत्त्वाचं विधान

दोन दिवसात दाखल करण्यात आलेले हे गुन्हे भारतीय दंड विधान कलम 188 अंतर्गत आहेत. त्याशिवाय मास्क न वापरलेल्या 40 जणांवर रविवारी कारवाई करण्यात आली. याशिवाय सार्वजनिक ठिकाणी गर्दी केल्याप्रकरणी 19 गुन्हे दाखल करण्यात आले.