‘मुख्यमंत्री माझी लाडकी बहीण योजना’ आम्ही बहिणींना मदत करण्यासाठी आणली आहे, विरोधकांना मात्र सगळा रस ‘माझी लाडकी मुलगी’ आणि ‘माझा लाडका मुलगा’ यातच आहे. त्यांना मुलाला किंवा मुलीला मुख्यमंत्री करण्यासाठी सत्ता हवी आहे, असे प्रतिपादन उपमुख्यमंत्री देवेंद्र फडणवीस यांनी आज केले. भारतीय जनता पक्षाने आयोजित केलेल्या ‘माझा लाडका देवाभाऊ’ कार्यक्रमात ते बोलत होते. अंधेरीत झालेल्या या कार्यक्रमाला महिलांची मोठी गर्दी झाली होती.

योजना कधीपर्यंत सुरू राहणार?

ऑनलाइन माध्यमातून या कार्यक्रमात सहभागी झालेल्या रत्नागिरी-सिंधुदुर्ग परिसरातील एका महिलेने ‘ही योजना कधीपर्यंत सुरू राहील’, असा थेट प्रश्न केला. त्यावर उपमुख्यमंत्री देवेंद्र फडणवीस यांनी आपले सरकार आहे, तोवर ही योजना सुरू राहणार, असे उत्तर दिले.

फडणवीस म्हणाले, ‘एक सोडून राज्यातील सर्व महिला आमच्या भगिनी आहेत. त्यांच्या कष्टांना, श्रमांना हातभार लावण्यासाठी आम्ही ही योजना सुरू केली आहे. ती थांबविण्याचा प्रयत्न विरोधक करत आहेत. त्यांनी एकदा माहितीत गोंधळ केला, काही ठिकाणी महिलांऐवजी पुरुषांचे फोटो टाकले. आम्ही अशा गैरप्रकारांना घाबरत नाही. आम्ही निवडणूक डोळ्यासमोर ठेवून ही योजना सुरू केली नाही. महिलांच्या सन्मानासाठी ही योजना आणली आहे. केवळ निवडणुकीपर्यंत ही योजना असल्याचा आरोप विरोधक करीत आहेत; पण आम्ही वर्षभर बहिणींना दरमहा ओवाळणी स्वरूपात मदत करणार असल्याचेही फडणवीस यांनी नमूद केले.

राज्यातील बहिणींचे प्रेम बघून मी सद्‍गतीत झालो आहे. या बहिणींचे माझ्यावरचे प्रेम हेच माझे सुरक्षाकवच आहे. या जोरावर कोणत्याही राजकीय आव्हानाला मी उत्तर देऊ शकतो. जनतेसाठी काम करताना बहिणींच्या या शुभेच्छा हीच माझी श्रीमंती आहे, असेही फडणवीस म्हणाले.