मुंबई महापालिकेत कोवीड काळात झालेल्या कथीत खिचडी घोटाळा प्रकरणी ईडीनं मोठी कारवाई केली आहे. त्यानुसार, या कथीत घोटाळ्यातील आरोपी युवासेनेचा सरचिटणीस सूरज चव्हाण याला अटक झाली आहे. सूरज हा शिवसेना आमदार आदित्य ठाकरेंचा विश्वासू असल्यानं हा ठाकरेंसाठी मोठा झटका मानला जात आहे. (Yuva sena leader Suraj Chavan arrested in BMC Khichdi scam case by ed)

मुंबई महापालिकेतील या खिचडी घोटाळा प्रकरणी यापूर्वी सूरज चव्हाणची ईडीकडून चौकशी करण्यात आली होती. तत्पूर्वी गेल्यावर्षी सप्टेंबर महिन्यात गुन्हे शाखेकडून सूरजची चौकशी करण्यात आली होती. या चौकशीत त्याच्या बँक खात्यांच्या तपशीलाबाबत धक्कादायक बाब समोर आली होती. या काळात सूरजच्या खात्यात ३७ लाख रुपये जमा झाले होते. त्यामुळं या मोहिमेत मोठा आर्थिक गैरव्यवहार झाल्याचा ठपका सूरजवर ठेवण्यात आला होता. (Latest Marathi News)

त्याचबरोबर या घोटाळ्यात आणखी एक नाव होतं, ते म्हणजे अमोल किर्तीकर. किर्तीकरची देखील खिचडी घोटाळा प्रकरणी गुन्हे शाखेनं चौकशी केली होती. किर्तीकरच्या खात्यात ५१ लाख रुपये जमा झाल्याचंही गुन्हे शाखेच्या सूत्रांनी त्यावेळी सांगितलं होतं. त्यामुळं आता सूरज चव्हाणवर अटकेची कारवाई झाल्यानंतर किर्तीकरवरही कारवाईचा बडगा उगारला जाऊ शकतो. अमोल किर्तीकर शिवसेनेचे ज्येष्ठ नेते गजानन किर्तीकर यांचा चिरंजीव आहे.