नांदेड : मुलांनो दररोज न चुकता शाळेत या. अभ्यास करा. आपल्या आरोग्याची काळजी घ्या आणि तंदुरुस्त रहा असा सल्ला देत जिल्हा परिषदेच्या मुख्य कार्यकारी अधिकारी वर्षा ठाकूर- घुगे यांनी सोमवारी (ता. १३) नांदेड तालुक्यातील नांदूसा येथील विद्यार्थ्यांशी मुक्त संवाद साधला. यावेळी विद्यार्थ्यांना चॉकलेट, बिस्कीट व विद्यार्थ्यांचे फुल देऊन स्वागत करण्यात आले.

दीर्घ काळानंतर सोमवारी ग्रामीण भागातील इयत्ता पहिली ते चौथी व शहरी भागातील इयत्ता पहिली ते सातवीच्या शाळांची सुरुवात झाली. ग्रामीण भागातील तीन हजार ११५ शाळा आणि दोन लाख पाच हजार २० विद्यार्थी तर शहरी भागातील इयत्ता पहिली ते सातवीच्या ३३४ शाळा आणि ८६ हजार ४८ विद्यार्थी आहेत या चिमुकल्यांच्या स्वागतासाठी ग्रामीण भागातील शाळा सज्ज झाल्या होत्या. पहिल्या दिवशी ठाकूर -घुगे यांनी नांदुसा येथील शाळेला भेट दिली. त्यांच्या समवेत प्राथमिकच्या शिक्षणाधिकारी सविता बिरगे, माध्यमिक शिक्षणाधिकारी प्रशांत दिग्रसकर होते.

कोरोना काय आहे? हात स्वच्छ का धुवायचे? व्यायाम केल्याने काय होते? तुम्हाला कोण व्हायला आवडेल? असे प्रश्न त्यांनी विद्यार्थ्यांना केले. विद्यार्थ्यांनी त्यांच्या प्रश्नांना मोकळेपणाने उत्तरे दिली. कुणी गाणी म्हटली तर कुणी कविता, कोणी एखादा सुविचार सांगीतला. अशाप्रकारे सगळी शाळा आनंदमेळा झाली.

लहान मुलांच्या चेहऱ्यावर आनंद ओसंडून वाहत होता. आजचे चित्र बघून मी आनंदी झाल्याचे वर्षा ठाकूर यांनी सांगितले. सरपंच प्रतिनिधी भास्कर जनुकवाडे, शिक्षक तसेच आठवीतील काही विद्यार्थींनीनी आम्हाला आठवीनंतर शिक्षणाची सोय करा. गावातच नववी आणि दहावीचा वर्ग उघडा, अशा पद्धतीची मागणी केली.

अंगणवाडीचे कार्य असमाधानकारक

अंगणवाडी क्रमांक एकमध्ये ठाकूर घुगे यांनी भेट दिली असता कार्यकर्ती आणि अंगणवाडी सेविकेला काहीही सांगता आले नाही. लाभार्थ्यांची संख्या देखील नीट सांगता येत नव्हती. साहित्याचे वाटप केल्याच्या नोंदी देता येत नव्हत्या. हा प्रकार पाहून त्या संतापल्या. मात्र, अंगणवाडी क्रमांक दोनमध्ये कार्यकर्ती व अंगणवाडी सेविकेच्या उत्कृष्ट कामाबद्दल वंदना गवारे व ज्योती गोदरे यांचा त्यांनी सत्कार केला. तेव्हा अंगणवाडी सेविकांनी अंगणवाडीसाठी वीज कनेक्शन, एलईडी टीव्ही देण्याची मागणी केली. शाळांना मोफत वीज पुरवठ्याबाबत किंवा शाळांचे वीज देयक अदा करण्याबाबत कार्यवाही करण्यात येत असल्याचे ठाकूर-घुगे यांनी सांगितले.