लोकसभा निवडणुकीत भाजपच्या उमेदवारांचा प्रचार करून पक्षविरोधी कारवाई केल्यामुळे अर्धापूर नगरपंचायतीच्या नगराध्यक्षासह १० नगरसेवकांची काँग्रेस पक्षातून हकालपट्टी करण्यात आली, अशी माहिती काँग्रेसचे जिल्हाध्यक्ष कदम यांनी सोमवारी (ता. ३०) पत्रकार परिषदेत दिली.

पत्रकार परिषदेला तालुकाध्यक्ष सुनील वानखेडे, तालुका प्रभारी डॉ. उत्तम इंगळे, बळिराम पाटील, शेख मकसूद, रवींद्र डाढळे, सुभाष लोणे, माजी जिल्हा परिषद सदस्य प्रल्हाद सोळंके आदी उपस्थित होते.

पक्षाने केलेल्या कारवाईची माहिती देताना कदम म्हणाले, प्रदेशाध्यक्ष नाना पटोले यांनी कारवाई करण्याचे अधिकार दिल्याने नगराध्यक्ष छत्रपती कानोडे, उपनगराध्यक्ष यास्मीन सुलतान अब्दुल मुसबीर खतीब, शालिनी राजू शेटे, डॉ. पल्लवी विशाल लंगडे, सोनाजी सरोदे, वैशाली प्रवीण देशमुख, मीनाक्षी व्यंकटी राऊत, नामदेव सरोदे, सलीम कुरेशी, साहेरा बेगम काझी सल्लाउद्दीन या नगरसेवकांची पक्षातून हकालपट्टी केली.

कारवाई अन्यायकारक

शालिनी शेटे लोकसभा निवडणुकीत पक्षाने आमच्यावर अविश्वास दाखवून कोणत्याही प्रकारची जबाबदारी दिली नव्हती. पक्षातून हकालपट्टी करण्यापूर्वी आमची बाजू मांडण्यासाठी संधी दिली नाही. त्यामुळे पक्षाने केलेली कारवाई अन्यायकारक आहे. ही एकतर्फी कारवाई केली असून, आम्ही पक्षाच्या वरिष्ठ नेत्यांकडे दाद मागणार आहे, असे गटनेत्या शालिनी शेटे यांनी सांगितले.

जिल्हाध्यक्षांना अधिकार नाही

पक्षाने आमच्यावर केलेली कारवाई अन्यायकारक आहे. काँग्रेसच्या जिल्हाध्यक्षांच्या गावात काँग्रेसचा उमेदवार पिछाडीवर आहे. त्यामुळे आम्ही पक्षाचे काम केले नाही असा आरोप करणे चुकीचे आहे, अशी माहिती नगराध्यक्ष छत्रपती कानोडे यांनी दिली.