कळमनुरी : सांडस (ता. कळमनुरी) येथील तरुण शेतकऱ्याने एका एकरमध्ये टरबूज पिकाचे उत्पादन घेतले. तसेच विक्रीचे नियोजन केल्याने तीन महिन्यात जवळपास दोन लाख रुपयाचा नफा मिळविला आहे. सांडस येथे उत्पादित झालेले टरबुज थेट काश्मीरच्या बाजारपेठेत विक्रीसाठी पोहोचले आहेत.सांडस येथील शेतकऱ्यांनी मागील काही वर्षाचा अनुभव पाहता टरबूज पिकांमधून कमी कालावधीत अधिक उत्पादन मिळवता येते, हे लक्षात घेतले. त्यानुसार खरीप हंगामातील शेतामधील पिकाची काढणी झाल्यानंतर पाणी उपलब्ध असलेल्या शेतकऱ्यांनी टरबुज पिकाची शेती करण्यासाठी पुढाकार घेतला आहे. टरबूज फळाचे उत्पादन घेणाऱ्या शेतकऱ्यांचा अनुभव पाहता परिसरातील अनेक शेतकऱ्यांनी आता टरबूज लागवड केली आहे. त्यामुळे या भागात टरबूज लागवडीचे क्षेत्र वाढले आहे.

गावामधील शेतकरी गजानन धावंडकर, दिगंबर वाघमारे, कुंडलीक निरगुडे, चंद्रकांत होडबे, रवी वाघमारे, सुनील निरगुडे, हनुमंत होडबे, कपिल निरगुडे यांच्यासह परिसरातील शेतकऱ्यांनी जवळपास पंधरा ते वीस एकर शेतीवर टरबुजाची लागवड केली आहे. यामधील गजानन धावंडकर या शेतकऱ्याने एक एकरवर टरबुजाची ता. पाच जानेवारीला लागवड केली. मागील अनुभव पाहता त्यांनी नियोजन करून वॉटर सोलीबल पद्धतीने खते व औषधी देऊन फळ वेलीची जोपासना केली. यासाठी त्यांना एकूण ६५ हजार रुपये खर्च आला.

टरबूज काढणीस आल्यानंतर त्यांनी ठोक भावात टरबुजाची विक्री केली त्यासाठी त्यांना दहा हजार पन्नास रुपये टन भाव मिळाला. त्यामध्ये त्यांनी १९ टन टरबूज विक्री केले. यामधून त्यांना एक लाख ९६ हजार रुपये उत्पन्न मिळाले. हे टरबूज थेट काश्मिरच्या कुलू मार्केटमध्ये विक्रीसाठी पोहोचले आहेत. शेतीमध्ये शिल्लक राहिलेल्या दोन किलो ते तीन किलो वजन असलेल्या टरबूज नगाची दहा रुपये किलोप्रमाणे विक्री त्यांनी स्थानिक बाजारपेठेत सुरू केली आहे. या मधून शिल्लक असलेल्या जवळपास पाच टन टरबुजाचे ५० हजार रुपये उत्पन्न मिळणार असल्याचे शेतकरी धावंडकर यांनी सांगितले.c